MRHGSA-in sipai bángte kawngzawh thláwp
Mizoram Home Guards Service Association (MRHGSA) chuan thuchhuah siamin, Mizoram Home Guards & Civil Defence (HGCD)-a director general (DG) post siam duh lohna lantira Mizoram Ex-Service League-in Aizawla kawng an zawh chu an thlàwp thu an tarlang.
MRHGSA chuan, MPSA leh MPSOA ten MRHGSA-te thil bulbâl hrechiang loa sorkar hmalakna dodala thil tia an puh chu pawi an tih thu sawiin, "Sorkar hnathawk pawl hran ni mah ila, hetianga inpuhna hi tun hnuah awm tawh lo se kan ti tak zet a ni," an ti.
MRHGSA tarlan danin, HGCD-a DG post siam chu an duh loh thu sorkarah an thlen ṭhin a, mahse, an ngennain awmzia a neih loh avangin High Court-ah an zualko a; chu chu India danpui hnuaia an chanvoah an ngai a ni.
MPS tana HGCD DG post siam chu Mizoram Police Service Association (MPSA)-te'n an member-te tana Mizoram sorkara secretary post an dilna kal zel vanga awm nia an hriat thu an tarlang a, "Home department hnuaia establishment hran kan nihna angin MPS-te'n anmahni chauh hamṭhatna atana he DG post siam tura hma an la hi hriatthiam har kan ti a, kan theihtawpin kan dodal zel dawn a ni," an ti.
Ministry of Home Affairs (MHA)-in Civil Defence din tura Mizoram sorkar a hriattirnaah DG post siam ngei tura tihna a tel lo tih sawiin MRHGSA chuan, "MRHG leh Civil Defence chhûn fin a nih pawhin post awm lai Commandant General hi a designation siamṭhain, Commandant General-cum-Director, Civil Defence tiin a enkawl mai tura ngaih a ni," an ti a; Compendium of Instruction, 2011-ah pawh DG post ziah lan a ni lo niin an sawi.
January 22, 2018-a High Court Judgement Order-in MRHG Act, 1985 siamṭha loin Commandant General chungah post a siam thei lo, a tih chungchangah MRHGSA chuan, "Mi ṭhenkhat, tute emaw pualin hamṭhatna siamin dan tihdanglam ni bik lul suh se," an ti.
State danga HGCD DG post-te chu IPS rank an ni hlawm nia sawiin MRHGSA chuan, "Chumi hre reng chunga MPS-a senior most post tana DG post siam hi ṭha kan ti lo a ni," an ti a; an lungawi lohna chu hamṭhatna phût vang ni loin, sorkarin a hnuaia thawkte duhsak bik leh thlei bik nei loin enkawl se an duh vang a nih thu an sawi.