KHAWTHLIR

Thisen pe
ṬKP Coordination, Lawngtlai area chuan nimin khan blood donation camp an huaihawt a, Lawngtlai East biala ṬKP unit pahnih - Nazareth leh Zion unit Lawngtlai District Hospital tan thisen unit 28 an pe a, a petute mipa 27 leh hmeichhia pakhat an ni. LIKBK Ṭhalai Pawl AOC Veng bialin Lawngtlai District Hospital tan thisen unit 26 an pe bawk a, a petute mipa 23 leh hmeichhia pathum an ni.

NLUP Kût khâr
Mamita ni hnih NLUP Kûtpui buatsaih chu June 14, Ningani khan khâr a ni. NLUP Kût khârna inkhawma khuallian Lalrobiaka, MLA chuan, NLUP Kût hlawhtling taka hman theih a ni chu lawmawm a tih thu sawiin, "Mipuite'n tun aia nasa lehzual hian kut hnathawh kawngah hma kan la thei. Thil ti thei lo tlata kan inngaihna hi kan paih a hun tawh a ni," a ti.

Building hawng
Siaha District Treasury office building thar chu June 14, Ningani khan Siaha DC Harleen Kaur-i'n a hawng. Building hi cheng nuai 113.56 sênga sak a ni a, chhawng thum niin, sqm. 400.32 a zau, room 16 a awm a ni.

MSU-in ngen
MSU chuan Anti Corruption Bureau (ACB) addl. SP Shershing Thapa service pawhseina thupek chu July 15, 2018 hmaa sut tur Home Minister an ngen. MSU tarlan danin, ACB Addl. SP hi a pension tawh hnuah May 30, 2018 thleng a service pawhsei sak a ni a, hemi hnu hian thla ruk atan a service pawhsei sak leh a ni.

Chaw nghei titawp
Mizoram Underground Returnee Association (MURA)-te'n Congress party nena an inremna tihpuitlin phût chawngheia lungawi lohna an lan­tirah, ni 9 chhung an pisaa chaw an nghei hnuah nimin khan chawnghei an titawp. Chawnghei an tihtawp chhhan hi nimina MPCC political secretary to Chief Minister KVL Siamkima leh MURA hruaitute an inbiak vang a ni.