Bunghmunah chhungkaw 29-in in rauhsan

Thorang bialtu MLA Zodin­tluanga chuan June 16, Inrinni khan a bial chhung, Bunghmun khaw chhung lei khite chu a enfiah. Bunghmun khawlaia lei khi vang hian chhungkaw 29-in an chenna in an rauhsan tawh a ni.

Bunghmun khuaa lei khi awmna hmun hi Falkawn Vengah a ni a, June 12, 2018 zingah hmuh ṭan niin, June 13-ah Bunghmun Falkawn veng mawngah lei a min tih hmuh a ni. Khawtlang hruaitute chuan, lei chu a khi zau zel a, mual zau tak chu a min mai a hlauhthawnawm tawh nia sawiin, hei vang hian in rauhsan takte chu ṭhiah thuai an duh thu minister Zodintluanga an lo hrilh.

Zodintluanga chuan, an dinhmun chu Lunglei Dis­trict Disaster Management Committee-ah thlen nghal a nih tur thu sawiin, "Lei a min vak palha a liampui mai turte hi ṭhiah a nih theih nan hmalak nghal a ni ang," a tih a; mahni in chhuahsantu chhungkuate hnenah zangnadawmna awm thei ang ang ngaihtuah a nih tur thu a sawi.

Lei khi huam chhungah hian Bunghmun Middle School a tel a, hei vang hian sikul khar rih a ni a, khawtlang hruaitute'n sikul atana hman tur an ngaihtuah mek a ni. Mahni in chhuahsantu chhungkua zinga ṭhenkhat chuan an chhungkhat laináte an fin rih a, chhungkaw ṭhenkhat chu hall-ah an invawm lut rih bawk.