Hunthar Vengah lei a tawlh belh zel ; B Sairengpuii in ṭhiat tura tih a ni

Hunthar Veng, Ai­zawla kum hmasa lam aṭanga leimin ṭhin chu kuminah a min leh avangin, a chhak lama B Sairengpuii (L) in chu June 15, Zirtawpni zan khan a nghing a, chim mai theia ngaih a nih avangin Aizawl District Disaster Management Authority chairman Dr A Muthamma, Aizawl DC chuan ṭhiah nghalna tur thupek June 16, Inrinni khan a chhuah.

B Sairengpuii building dinna leilung awm dan hi Inrinni khan PWD, Disaster Management & Rehabilitation, National Disaster Response Force leh AIE mithiamte'n an enfiah a; in dinna lei chu a chet zel avangin in chu tlu mai thei renga ngaih a ni. In dinna leh a thlanga lei chu tlemtê têin a tawlh reng a, in hnuai pawh a pûk tawh a ni.

Aizawl DC-in B Sai­rengpuii in ṭhiahna thu­pek a chhuahah chuan, in chu a chim mai a hlauh­thawnawm tawh avanga chhiatna lian zawk thleng thei a nih avangin thupek a chhuah thu leh, ADDMA nodal officer-te'n a hmunah an enfiah hnuah an report anga chhuah a nih thu a tarlang a; B Sairengpuii in leh a bula Vaninmawia ina khawsa chhungkaw pariatte pawh an insawn chhuak vek tawh tih a tarlang.

Lei tawlh avangin B Sairengpuii in hma lama Vaivakawn-Company Pêng kawngpui pawh a him tâwk loa ngaih a ni.

Traffic SP H Ram-thlengliana chuan Inrinni khan hriattirna tichhuakin kawngpuiah hian medium vehicle leh a aia liante tlan phal a ni lo.

Traffic SP-in hriattirna a chhuah dan chuan, Vaivakawn-Company Peng kawng hi lirthei tê chi (LMV leh a aia tê) tan chiah zawh theih a ni ang a; lirthei tê chite pawh chhuk leh chho zawnga tlante intlan chhâwk a ngaih dawn avangin a theih chin chinah Ram­rikawn-Lungverh via Sakawrtuichhun kawng hmang uar turin mipui an ngen.

Temple-Vaivakawn inkarah 407 truck leh a aia liante chhuk leh chho zawnga an tlan a ngaih dawn avangin zan dar 8 leh a tûk zing lam dar 7 inkarah lirthei reng reng Vaivakawn-Temple Square kawngpui sirah dah/hûn phal a ni lo.

Vaivakawn aṭanga Temple lam pana 407 truck leh a aia lian motor tlan turte tan zan dar 9 leh zing dar 2 inkarah tlan tur a ni a, Temple Square aṭanga Vaivakawn pana tlan turte chu zing dar 2:30 leh 6:30 inkarah tlan tur a ni thung.

Truck ruak, Ramri­kawn leh Lungmual lam aṭanga Sairang lam pan turte chu Vaivakawn kal­tlang loin zan dar 8 leh zing dar 8 inkarah Ramrikawn-Lungverh via Sakawrtuichhun kawng­ah tlan tur a ni.

Hetih lai hian, Ram­rikawna FCI kudamah buhfai chhêk mek a nih avang leh Hunthar Veng kawng a him loh bawk si avangin Ramrikawn leh a chhehvelah loh theih lohin truck lian an din a ṭul dawn a, hriatthiamna zau tak nei turin Traffic SP chuan mipui a ngen a, "Truck khalhtute pawh kawng sira lirthei dah danah mipui vantlang harsatna thlen lo thei ang bera insiam rem tura beisei an ni," a ti.

Traffic SP hriattirna hian June 15 zan dar 10 aṭanga thu leh awm hma zawng a awh dawn a, a ṭul anga tihdanglam theih a ni. Chhiatrupna thil, kângmei leh rîkrum kaihhnawiha dan leh thupek pawimawh bika duty-te chet velna a huam lo thung.