KHAWTHLIR

Governor-in tlawh
Governor Kummanam Rajashekharan chuan, India rama bishop senior berte zinga mi Dr Philipose Mar Chrysostom (101) chu June 16, Inrinni khan khan a chenna hmun Pathanamthitta, Kerala-ah a tlawh. Larsap sàwmna chhangin Dr Philipolse Mar Chrysostom chuan, August 15, 2018-ah Mizoram tlawh a duh thu a sawi.

Heroin man
Aizawl SP hnuaia District Special Branch chuan June 16, Inrinni tlai dar 3 vel khan Berawtlangah Lalchhungi, Myanmar hnen aṭangin heroin hawng 18 an man a, heroin hi tualchhunga hralhna ang chuan Rs. 7,20,000 hû a ni. Excise & Narcotics-a Anti-Narcotics Squad pawhin June 15 zing khan Lalawmpuia (29) s/o C Lalzawma (L), Saikhamakawn hnen aṭangin heroin gram 48 leh Alprazolam mûm 50 an man bawk.

Thisen pe
HBK MMA Gym, Kulikawn chuan Inrinni khan Synod Hospital blood bank-ah thisen kalin thisen unit 13 an pe. Inrinni vek hiah Synod Hospital-ah hian individual voluntary blood donation unit 8 a awm bawk.

Lui humhalh zirho
Aizawl Theological College leh Save Chite Lui Coordination Committee chuan, June 16, Inrinni khan Synod Conference Centre-ah lui leh tuihna humhalh chungchang zirhona leh sawihona hun an buatsaih. Seminar hi kohhrante tana buatsaih a ni a, Aizawla Presbyterian Kohhrana tualchhung kohhran 94 aṭangin aiawh pahnih ṭheuh tel tura sawm an ni.

Ruihhlo hâl ral
Bethlehem Vengthlang Branch YMA chuan June 15 khan YMA Day an hman rualin an veng chhung leh páwn aṭang ruihhlo chi hrang hrang an man Rs. 6,70,280 hû chu an hâl ral. Ruihhlo hâl ralnaah hian Bethlehem Vengthlang Local Council chairman Kapzauva'n a dep kai a ni.

Lunglei kawng
Lunglei SP C Lalthanmawia chuan Aizawl-Lunglei kawngpuia lirthei kal dan turah hetiang hian hriattirna a chhuah: Aizawl-Lunglei kawng, NH-54 a min avangin World Bank Road chiah a tlang a, hei vang hian World Bank Road-a Lunglei-Pukpui-Tlawng kawng chu lirthei lian chi kal theiha hawn a ni dawn a, mahse, lirthei ke 10 neite erawh chu tlan phal a ni dawn lo.