MNYF-in bawlhhlawh paih motor an enfiah ; SIPMIU motor 50 lei mipui zah lohnaah an ngai

SIPMIU-in Aizawla bawlhhlawh paihna truck (tipper) a leite chu MNF party ṭhalaite chuan June 16, Inrinni khan an enfiah a; bawlhhlawh paih truck-te chu to uchuak taka lei a ni ngeia an ngaih thu leh, chu chu mipui zahlohna nia an ngaih avangin SIPMIU enkawltu minister Zodintluanga chu a pisa luah zel tlaka an ngaih loh thu an sawi.

MNF ṭhalaite hian SIPMIU lei bawlhhlawh paih motor-te hi an vice president H Ramdinliana hoin mi ṭhahnem takin an enfiah a; "Mizoram sorkarin LPK 407 tipper 50 an leiah motor man pangngai baka an sum hman a tamna hi Rs. 5,00,00,000 aia tlem lo a ni a, a to uchuak hle a, sawi mâm chi-ah kan ngai lo. A changtu minister hian a office hi luah chhunzawm lo se kan duh tak zet a, Mizoram leh Mizo mipui thlavang hauhin hma kan la zel dawn," an ti.

MNYF tarlan danin, bawlhhlawh paih motor lei tura tender an koh hun chu kum 2016 a ni a, a man pawh kum 2017-ah pe tlak a ni. Motor hring pakhat lei nan Rs. 21,23,000 leh a pawl lei nan Rs. 19,87,890 sen niin, a hring leh a pawl 25 ve ve, a vaiin motor 50 lei nan Rs. 10,27,72,250 hman a ni.

Motor 50 lei tura tender koh hun laia LPK 407 man chu Rs. 9,00,000 vel a ni tih sawiin MNYF chuan, "An endiknaah motor tharin tipper body chhah chi a chhawm ang kha motor-ah hian a awm lo a, a body zawm sang mah se, tuna an plain-sheet hman enin, a man hi a tláwm zawk tura ngaih a ni. SIPMIU-in kahpathir milimeter 4-a chhah Aizawlah lei tur a awm loa a sawi hi a dik lo a, tunah hian Aizawlah phek khat Rs. 8,000 man a ni," an ti.

SIPMIU-in bawlhhlawh paih motor an lei aṭanga kum hnih hnuah kuminah Tata LPK 407 tipper tho UDPA department-in Serchhip leh Lunglei district-a mi tur an lei a, pakhat Rs. 14,50,000 chuang hretin an lei tih sawiin, "SIPMIU motor body zawm san ang chena an zawm sànna man leh hmanraw man chu Rs. 2,50,000 chauh a ni a, Aizawla sak a ni," an ti a; UDPA lei chu SIPMIU lei aiin a ṭha zawka an hriat thu an sawi.

MNYF chuan, Tata dealer-in tuna LPK 407 tipper a zawrhna chu Rs. 12,27,000 a ni a, UDPA-in Rs. 14,50,000 chuanga an lei pawh eirukna a awm nia a lan thu an sawi a, "Chutih laia kum hnih kal taa SIPMIU-in Rs. 21,00,000 chuang leh Rs. 19,87,000 chuanga an lei hi hriatthiam theih loh sual lian tak a ni," an ti.

MNYF chuan, SIPMIU-in bawlhhlawh phur motor an leite chu bawlhhlawh zâng tak tak phur tur a nih thu leh, motor siamtu company-in cubic meter 8 a siam chhuah Tata LPK 1618 man anga LPK 407 an lei chu inbumna dik tak a nih a nih thu a sawi bawk.