Serchhip dáia NH-54 min siam dan tur enfiah
Serchhip Sailiam kawn piaha National Highway 54 kawngpui metre 100 vela thui min bal vek chu June 16, Inrinni khan PWD chief engineer (Highways) K Lalsawmvela'n a hmunah a tlawh a; kawng siam ṭhat dan tur leh siam chhunga a hêlna tur kawng thawm ṭhat dan tur a enfiah.
NH-54 min hi siam ṭha tur chuan a chhak lamah laih belh a ngai dawn a; PWD Chief Engineer leh sorkar hotu dangte'n an ruahman dan chuan, kawng laih hna chu a rang thei ang bera ṭan a, Serchhip lam leh Keiṭum lam aṭangin Hitachi excavator pahnih tal hmanga laih tum a ni a, nimin khan excavator pahnih hmangin laih ṭan nghal a ni.
Engineer-te chuan, kawng laih belh hna chu tluang taka thawh a nih chuan chawlhkar khat chhungin lirthei kal theiha laih tlang theih an beisei a ni. Chutih rualin, kawng laihna tur chu mimal ram a nih avangin a neitute chhungkua biakpawh a ni tawh.
Thuneitute chuan, kawng laih zauhna tur ram neitute'n harsatna an siam loh an beisei a, a ṭul anga indawr zui zel a ni ang.
NH-54 hi double lane-a zauh thawh tur a nih tho avangin, chuta tana hna thawh hunah chuan tuna kawng zauh turah pawh zangnadawmna pek dan tur pawh ngaihtuah ni se, an ti.
NH-54 kawngpui minna chhak lamah hian Mizoram chhim lam kawlphetha pekna 132KV line hruipui thlunna tower a awm bawk a, min mai theia ngaih a nih avangin tower pawh a rang thei ang bera sawn tum niin, hmalak dan tur pawh Power & Electricity department hotute'n a hmunah an enfiah tawh a ni.
NH-54 kawngpui a chhiat chhunga a hêlna turin Serchhip Sailam kâwn aṭanga Hriangtlang lam kawng chu Serchhip DC, District Disaster Management Authority chairman ni bawk hmalaknain June 15, Zirtawpni khan then a ni.
Hriangtlang lam kawng hi Keiṭum thlen hma Dawngzawlah a chhuak a, lirthei tê tan zawh theih a ni a; mahse, kawng a ṭhat loh avangin lirthei chak ṭha deuh tan lo chuan tlan a harsa dawn nia thu dawn a ni.