MLA pahnihin Tuirini lui/lei an enfiah ; Chalfilh Group YMA-in sorkar an nawr ná

Tuivawl bialtu MLA RL Pianmawia leh Chalfilh bialtu MLA Dr Ngurdingliana te chuan June 16, Inrinni khan an bial chhung panna kawnga Tuirini lei chim vanga harsatna thleng mek chu a hmunah an enfiah.

Hetih lai hian, Chalfilh Group YMA chuan resolution siamin, Tuirini lui kaina tur lei dawh vat a nih loh chuan an huam chhunga sikulte leh sorkar pisate khâr a nih dawn thu an puang.

Sesawng leh Khawruhlian inkara Tuirini leia YMA hnatlangin kal kaina tur an siam chu tun hnaia tuilianin a tichhe tawh a, hei vang hian lirthei hmang leh kea kal kai theih a ni lo.

Lawngleng pakhat hmangin an inthiar kai ṭhin a, mahse, lawnglengah a khalhtu bakah mi patuhm chiah an chuan theih avangin mipui mamawh a phuhru zo lo hle a ni.

MLA pahnihte hian mipui harsatna zualpui sutkian a nih theih nan Tuirini lui kanna turin kea kal kaina tur lei siam dan tur an buaipui a; RL Pianmawia chuan lawngleng hmanga lui kântute him zawkna atan life Jacket pathum a pe. Life jacket dang paruk chah mek a ni bawk.

MLA pahnihte leh khaw­tlang hruaitute'n an ruahman dan chuan, lei chimna bulah kea kal kaina tur lei (extension bridge) siam tum a ni a, lei siam hna chu Khawruhlian Vengthar Branch YMA-in an thawk dawn a, tun karah hna an ṭan beisei a ni. Extension bridge hi chawlh­kar hnih chhunga siam zawh an beisei.

Hetih lai hian Chalfilh Group YMA huam chhunga V/C-te leh YMA branch hruaitute kalkhawm chuan resolution pass in, February 13, 2018-a Tuirini lei chim tawh, sorkar in May 2018 chhung ngeia dawh zawh a intiam laia tun thlenga dawh zawh a la ni lo chu pawi an tih thu an tarlang a, "Lei dawh mek hi July 2018 ral hma ngeia dawh zawh a nih loh chuan Chalfilh Group YMA huam chhunga zirna-in leh sorkar office zawng zawng August 1, 2018 aṭangin tiamchin awm loa khâr a ni ang a, Independence Day pawh boycott a ni ang," an ti.

Aizawl lam aṭanga Darlawn tlangdung kawng dang, Saitual aṭanga Buhban leh Chalfilh Vanzau kawnga Khanpui khuaa lut thla chu a chhe hle tih sawiin, chu kawng chu a siamna tur a sum awm vek nia sawi a nih laiin, hmalakna a muang hle niin an sawi a; tun aia chak zawka siam turin sorkar an phût tih a tarlang.

Resolution chuan, "Darlawn tlangdung mipui tana harsatna nasa tak thlentu Tuirini lei dawh hna muang lutuk hi a changtu PWD Minister hian a hmun ngeiah rang takin rawn en rawh se," an ti bawk.

Thu dawn danin, hmar tlangdunga khuate hi Seling-Saitual-Phullen-Suangpuilawn-East Phaileng lam kawngah kal pawh theih a ni a, mahse, kawng a inthui hleih hle. Seling-East Phaileng inkar hi tuna lei chhiat­na lam Sesawng-Khawruhlian kawngah km. 62 a nih laiin, Seling-Saitual-Phullen-Suangpuilawn-East Phaileng lam kawngah chuan km. 162 a ni a, km. 100-in a inhlat hleih a ni.