Lei tawlh vangin Darlawnah in panga rauhsan

June 15, Zirtawpni aṭang khan Darlawn Venghlunah lei a tawlh a, hei vang hian chhungkaw panga an insawn chhuah tawh bakah, in pahnih ṭhiah a ni tawh.

Darlawn aṭanga thu dawn danin, Darlawn Venghluna lei tawlh hi June 15 chawhma dar 11 vela inṭan a ni a, lei hi ft. 5 velin a tlahniam tawh. Lei tawlh huam chhunga awm Lalnunthara in, Krossnunpuia luah mek chu Inrinni khan ṭhiah a ni a; K Lalzela, Lalhmasaa, Vanlalhluni leh A Lalrinmawia te in chhunga bungruate senghawi a ni tawh bawk.

Darlawn Venghlun V/C-te chuan mahni in chhuahsantu chhungkuate bungrua chu Darlawn Venghlun Kohhran hall-ah an dahsak a, an awmna tur an ngaihtuahsak nghal a ni.

Darlawn Venghlun V/C member Henry Biak­thansanga chuan, lei tawlh­na lai vel chu lei thàwlna lai a nih thu sawiin, "Lei chêtna hmun hi Darlawn High School-II thlang aṭanga inṭanin, Agriculture department office kawngin a la dang niin a hriat. Ruah a sûra lei a che leh a nih chuan a mualin a min vek thei dawnin a lang," a ti.