KHAWTHLIR

Tuikual South Branch YMA chuan Central YMA ruahman angin nimin khan an hall-ah blood donation camp an huaihawt a, Aizawl Civil Hospital tan thisen unit 79 pein, a petute mipa 64 leh hmeichhia 15 an ni.

Aizawl North-I bial­tu MLA Vanlalhlana, Aizawl North-II bialtu MLA Dr Vanlalthlana leh Lengteng bialtu L Thangmawia te chuan Thawhlehni zan leh nimin khan an biala local task force-te tlawh kualin, an bial mipuite'n harsatna an tawh loh nana hmalak dan tur an sawipui. Dr Vanlalthlana chuan a biala local task force-te chu hand sanitizer leh Rs. 5,000 ṭheuh a hlan a, Vanlalhlana'n mi harsate ṭanpui nan local task force-ah pawisa a hlân a, L Thangmawia'n buhfai leh pawisa a sem a ni.

State Referral Hospital OPD chu nimin aṭang khan tiam chin awm loin khâr rih a ni a, mipui tan inentir theih a ni lo. 

Mizoram Cooperative Apex Bank Employees' Union chuan State Level Task Force on Covid-19 hman turin Health Minister hnenah nimin khan Rs. 2,00,000 an hlân. Mamit bialtu MLA, H Lalzirliana chuan Covid-19 donaa Mamit district task force-te hman turin district task force chairman Dr Lalrozama, bawrhsap hnenah Rs. 50,000 a hlan a; AMC Ward-I councillor R Zomuanpuii'n Muanna Veng task force hnenah Rs. 5,000 a pe bawk.

Chief Minister's Office chuan thuchhuah siamin, 'Mi harsa zualte chhawm­dawlna tur ṭanpuina chhûn khawmna CM's Relief Fund chu CM/CMO-in an dawng thei lo' tia social media-a thu thehdarh chu belhchian dâwl lo a nih thu a tarlang. 

Rajya Sabha MP Ro­nald Sapa Tlau chuan Covid-19 donaa a ṭul apianga an hman turin a MPLAD fund aṭangin Indian Medical Association (Mizoram Chapter) hnenah Rs. 10,00,000 a pe.

Zonet Cable TV chuan March 26 aṭangin zan tin 'Thlamuanna Hun' tih chu an tichhuak ṭhin dawn a, vawiin tlai dar 5:00 leh zan dar 9:30-ah R Lallungmuana'n Pa-thian thuchah a sawi ang.