Aizawlah in sak phal lohna hmun siam a ni ; Duh duha lei laih khap a ni - Aizawl Mayor

Aizawl Municipal Corporation (AMC) hotute chuan nimin khan an pisaah thuthar thehdarhtute an kâwm a; AMC Site Development & Slope Modification (SDSM) Regulations, 2017 hnuaiah Aizawl khawpui chhungah in sak phal lohna hmun siam thar a nih thu sawiin, "He dan hnuaiah hian Aizawl khawpui chhungah duh duha lei laih khap a ni," an ti.

Aizawl mayor Lalrinenga Sailo chuan, SDSM Regulations chu mipui leh khawpui himna tura ruahman a nih thu sawiin, "Aizawl hi tlang ram, lei min duh em emna hmun, lirnghing nasa tak tuar theih kan nih avangin Regulation hi siam a ni. AMC hmalakna ve liau liau a nih avangin kan chhuang ve hle," a ti a; Regulation chu October 29, 2021-a hman ṭan turin notification chhuah a nih thu a sawi.

Aizawl khawpuiah ṭhenawmte in sak avanga in leh loh chán an awm ṭhin tih sawiin Lalrinenga chuan, "In leh lo chán chiah lo, dinhmun hlauhawma an awm avanga rilru hah tak takte pawh an awm ṭhin. Leimin avanga nunna chán pawh eng emaw zat an awm tawh. Hengte hi 100% chu vèn theih a ni kher lo thei a, Regulation hmang hian kan tinêp ngeiin kan ring," a ti.

Lalrinenga Sailo chuan, dan tharin a tum sawiin, "Lung tla, lei tlahniam, àwm lo lutuka in sak, tuilian leh chhiatna dang tam tak tihnêp leh mumal zawka khawpui thli thehthangte a ni. Inkaihhruaina kan zâwm ṭha em tih uluk takin en zui a ni dawn a, a ṭul angin dan loa thil tite chu dan anga hrem an ni ang," a ti a, dan zâwm lote chu pawisa chawitir leh jail tàn thleng hrem theih an nih thu a sawi.

Kum 2000-2021 chhungin Aizawlah leimin lian tham deuh ṭum 120 vel a thlen thu sawiin Mayor chuan, "A duh duhin duh duhna hmuna lei an lài ṭhin hi thunun kan tum. Mithiamte kaihhruaina hnuaiah dan fel tak nen lei laih a ngai tawh. Leimin tam tak chu kan pumpelh thei tawh dawn a, a tìrah mipui hun pe deuhin kan khauh lo deuh a, kan khauh tulh tulh dawn," a ti.

Aizawl Mayor sawi danin, SDSM Regula­tions atan hian mithiamte chuan Aizawl khawpui zir chiangin, hmun him leh him lo deuh laite leh in sak phal lohna hmun turte an chhinchhiah a; in sak phal lohna tur hmun eng emaw zatah a awm.

Zawhna chhangin Lalrinenga Sailo chuan, "He dan kan hman avanga harsatna awmte chu state sorkar nena ṭangkawpin a ṭul angin kan hmachhawn zel turah kan ngai. Han kal pawp ngaihna chin a awm a ni," a ti.

AMC SDSM Regulations hman ṭan a nih tawh avangin lei lài turte chuan AMC-ah phalna an dil zel a ngai tawh a, lei an laihna hmun tur mithiamte'n an endik hnuah chauh hna thawh ṭan theih a ni tawh dawn a ni.

SDSM Regulations-in a huam lohte
 AMC enkawl bawlhhlawh paihna hmun laih
 Defence Ministry
 Hmun fál leh reh, lei laih avanga mimal leh vantlang tana harsatna awm lohna tur hmun, AMC official-in a remtihpuiin
 In hmun laih leh phalsak tawhna hmuna a tlawhpawhna tur a thûk zawng metre 1 tling lo leh lei laih vûng cubic metre 10 tling lo
 Lei chhûn zàwl a nihin cm. 30 aia chhah lo, lei chhûn vûmin cubic meter 30 pêl lo, lei chhûn vûm dâwlna siam ngai lo leh tui luankawr tibuai lo
 Leilung hausakna zawngtu soil engineer emaw engineering geologist emaw kaihhruaina hnuaia kalpui
 Thlàn laih
 Rîkrum thilah, mi nunna, in leh lo hlauhawma a awmin, chhanchhuah leh tihziaawmna atana lei laih a ngaihin. Mahse, ni 15 ral hmain building official-te hriattir tur