Kumin chhungin Khuangthingah rúlin Mi 20 vel a chu tawh, mi pahnih an thi

Champhai district-a Khuang­thing khuaah kumin chhungin rúlin mi 20 vel a chu tawh nia sawi a ni a, chu'ng zinga mi pahnih chu an thih bakah, damdawi-ina enkawl mek mi pakhat a awm. Mitthite leh enkawl bik ngaite hi sorkarah zangnadawmna/râlna dil tura thuràwn pek an ni.

Khuangthing YMA hruaitute zinga mi H Lawmthanga hnen aṭanga thu dawn danin, Khuang­thingah hian kumin chhungin rûlin mi 20 vel a chu tawh a, a tam zawk chu rúl hlauhawm lutuk loin a chukte an nih avangin harsatna lian tham an táwk lo. Chutih laiin, mi pahnih - Hrang­chhunga leh Hmunsiami te erawh chu an thi a ni.

Kumina rûl chuk vanga thi hmasa zawk Hrangchhunga (73) chu October 12, 2021 zing dar 5 pelh hretah chawngkawrin a ke ding lam leh a kutah a chù a, chawngkawr chu ft. 6 chuang hreta sei a ni. Hrangchhunga chu Khawbung damdawi-in (PHC) panpui nghal ni mah se, damdawi-in thlenpui a nih chuan a thi tawh niin an sawi.

November 10, 2021 pawh khan Khuangthing khaw mi vêk, Hmunsiami (64) w/o MC Lalngaihdama chu an lo-ah rulin a chu hlum. Thu dawn danin, Hmunsiami hi amahin lo-ah a feh a, zan khaw thim thlenga a haw loh avangin a pasal leh a ṭhiante'n an ngaihven a, vau bul hnaiah thiin an hmu a ni. A kheimit vei lamah leh a kut dinglam zungṭangah rûl chukna ni ngeia hriat hmuh a ni a, a chuktu rûl hmuh a ni lo.

Hrangchhunga leh Hmun­siami te chanchin an hriat veleh Champhaia District Forest Officer, EFCC department leh police hotute'n an ngaihven nghal a, Rs. 10,000 ve vein an râl a ni.

Khuangthinga Health Sub-Centre-a thawkte chuan rûlin a chuk mi 20 vel kuminah an enkawl tawh thu an sawi a; rûlin mihring a chuk fo avangin East Tuipui Bialtu MLA Ramthanmawia leh sorkar hotu dangte hmalaknain tun hnai khan Khawbung damdawi-inah rûl túr thahna anti-venom dah thar a ni.

DFO Lalduhthlana chuan Vanglaini palai zawhna chhang­in, tun hnaia rûlin a chuk hlum Hmunsiami chanchin chu hriattir nghal an nih angin Khuangthing­ah an kal nghal tih a sawi a, "Rûl chuk a nih leh nih loh kan enfiah a, a taksaah hliam dang engmah a awm loh avangin rúl chuk a ni ngeiah kan ngai," a ti.

Hmunsiami chuktu rûl chu eng rûl nge tih an hre mai thei lo tih sawiin Lalduhthlana chuan, "A hmuamhma ênin rúl lian tak a ni tih a hriat a, rúlngán emaw, chawngkawr emaw a nih a rinawm," a ti a; tunah pawh hian Khuangthing mi pakhat chu rûl chuk vang bawkin Aizawl Civil Hospital-ah enkawl mek a nih thu a sawi.

Champhai DFO sawi danin, rûlin a chuk vanga harsatna tâwkte'n zangnadawmna/râlna sorkarah an dil thei a; rûl chuk vanga thite chu sorkarin Rs 2,00,000-in a ràl theih bakah, ramtuileiloa awm phahte chu chhawmdâwlna Rs 2,00,000 pek theih a ni a, hliam dangte chu an inenkawlna senso ang zat pek theih a ni bawk.

Kuminah Khuangthingah mi 20 vel rûlin a chuk tawh avang leh mi pahnih an thih tawh avang hian Bialtu MLA bultumin Aizawla rúl chanchin hria leh buai­pui ṭhin mi ṭhenkhat chuan Khuangthing an chàmchilh mek a, rúl hmuh leh man erawh an la nei chiah lo nia thu dawn a ni.