Aizawlah sorkarin phalna a peka tel lo zirlaite sikul kaltir an awm?

Aizawl khawpuiah sorkarin sikul kal a phal­sak tawh - pawl 10 leh pawl 12 zirlaite ni lo, pawl dang zirlaite sikul kaltir an awm nia thu dawn a ni.

Hemi chungchangah hian School Education director James Lalrin-chhana chuan, sikul hrang hrangte chu department-in ngaihven reng mah se, sorkarin kal phalna la pek loh zirlaite kaltir sikul an hriat rih loh thu a sawi.

Thu dawn danin, Aizawla mimal sikul (private school) zingah HSLC (pawl 10) leh HSSLC (pawl 12) exam hma­chhawn turte ni lo pawl dang zirlai sikul kaltir an awm a, dan pangngai (offline)-a sikula exam neihpui tumte pawh an awm nia thu dawn a ni.

Hemi chungchangah hian School Education Director chuan, Covid-19 inkaih­hruainaah chuan Aizawl khawpuiah pawl HSLC leh HSSLC exam tur pawl 10 leh pawl 12 zirlaite chiah sikul kaltir phala nih thu leh pawl dang zirlaite chu sikul kaltir phal a la nih loh thu, zawhna chhángin a sawi.

James Lalrinchhana chuan, November thla chawlhkar hnihna vel aṭangin School Education department-a thawkte'n additional director hoin Aizawla sikul hrang hrang an tlawh ṭhin tih sawiin, "Hei hi zirlai sikul kal la phalsak loh kaltir an awm leh awm loh endik ai mahin, sikul kal phal tawh chinah harsatna nei an awm leh awm loh enfiahna a ni ber," a ti a; sikul kal la phalsak loh zirlaite sikul kaltir chung-changah report an la dawn loh thu Vanglaini a hrilh.

Sorkarin sikul kal tura tihte ni lo sikul naupangte sikula kaltir chu sorkar thu bawhchhiatna a nih thu sawiin James Lalrinchhana chuan, "Sorkar thu zâwm loa zirlaite sikul kaltir an awm a nih chuan thil serious tak a ni a, sorkar thu zahlohna a ni," a ti.

School Education Director chuan, Aizawla hostel zingah pawh hawng ru an awma an hriat avangin an enfiah a, a tir lamah chuan an man chhuak mai thei lo a, a hnuah erawh an man chhuah thu a sawi bawk.