Minister-in ruahsur sûlhnu a enfiah

Minister of state TJ Lalnuntluanga, Champhai South bialtu MLA chuan tun hnaia ruahsur nasa vanga Khawchhak Tuipui lianin Champhai leilet záwl a chîm leh a bial chhunga harsatna a thlente a enfiah a; Champhai DC Maria CT Zuali, SP Lalrinpuia Varte leh sorkar official dangte'n an ṭawiawm.

TJ Lalnuntluanga chuan, chhiatna hrang hrang thleng chu pawi a tih thu sawiin, "Ṭanpui ngaite ṭanpui leh a ṭul angte ngaihvena bawhzui vat ṭhintu Bawrhsap leh a thawhpui te, Champhai SP, line department, khawtlang hruaitute leh tlawmngaia chhiat tâwkte puitu zawng zawngte inpekna leh hmalakna a fakawm tak zet a ni," a ti.

Minister chuan, tui lianin Champhai leileta harsatna a thlen te, khuarel leh mihring siam chhiatna thleng ṭhin dangte chu inzir thar nan leh hmasawnna kawng kawhhmuhtu atana hman ni se a duh thu leh ṭan lak a ṭul thu a sawi a; sorkar hotute chu harsatna awmte ngaihven a, a ṭul anga hma la zel turin a chah.