Governor-in CYMA hruaitute a kâwm

Governor Dr Hari Babu Kambhampati chuan nimin khan Raj Bhavan-ah Central YMA hruaitute a kâwm a, YMA kalphung leh ram tana an rawngbawlnate a sawipui.

CYMA hruaitute chuan, ramngaw leh nungchate humhalh turin Environment, Forest and Climate Change department nen an thawh dun thu te, lui leh lui dunga nungchate humhalhna turin Fisheries department nen an thawhho thu te, kawngpui ṭha nei turin PWD nen an thawhho thu te, YMA kumpuan 'Zirna uar' an kalpui mek thute leh, Mizorama zirna siamṭhatna tura rawtna hrang hrang a neihte Governor an hrilh.

Mizorama Myanmar ráltlânte chungchangah CYMA hruaitute chuan, sorkar laipui aṭanga ráltlante ṭanpuina leh chhawmdawlna emaw, anmahni ngaihsakna a awm lo chu pawi an tih thu an sawi a; raltlante chungchangah theihtawpa hma la tur leh ráltlante dinhmun hre chiang turin amah ngeiin an awmna hmun tlawh turin Larsap chu an ngen a ni.

CYMA hruaitute chuan, sorkar laipuiin Mizoram chu a ngaihsak tâwk loa an hriat thu sawiin, "Tun aia nasa zawka sorkar laipuiin Mizoram a rawn ngaihsak theihna atana hma la turin kan ngen che a ni," an ti.

India Danpui 8th Schedule-ah Mizo ṭawng dah a nih ve theihna tura YMA-in hma a lo lak tawh dante sawiin CYMA hruaitute chuan, a hlawhtlin theih nan theihtawp chhuahpui turin Governor chu an ngen bawk.

Dr Hari Babu Kambhampati chuan, Mizoram leh hnam tana YMA hnathawh leh khawtlang tana an rawngbawlnate a lo hriat ve thu leh lawmawm a tih thu a sawi a; CYMA hruaitute chu an thu thlente a theih anga anga a lo bawhzui tur thu a hrilh a ni.