East Lungdar 132kV sub-station hawng

Power & Electricity minister R Lalzirliana chuan nimin khan East Lungdara 132kV sub-station leh line thar a hawng. Sub-station thar hi cheng nuai 795.76 sénga siam a ni.

R Lalzirliana chuan, 132 kV sub-station leh 132 kV hruipui thlun tharte chu khawchhak, chhim leh hmar tlangdungte'n an chhawr ṭangkai dawn thu a sawi a, "Khawchhak tlangdung chu 132 kV Aizawl - Saitual - Khawzawl - Champhai line chauhin a châwm ṭhin a, khawi laiah emaw line chhia a awmin kawlphetha nasa takin a khaihlak ṭhin. Serchhip (Bûkpui) - East Lungdar - Khawzawl 132 kV line hman theih a nih takah chuan power supply hi Aizawl - Bukpui - East Lungdar - Khawzawl aṭangin 132 kV level-a pek theih a ni ang," a ti.

Tun hmain line siamṭha turin kawlphetha tihtawp (shutdown) hleih theih a ni lo tih sawiin R Lalzirliana chuan, "Siamṭhat hna thawh a nih pawhin line siamṭhatute'n rang taka an thawh a ngai ṭhin a, duh thálin hna an thawk hman ṭhin lo," a ti a; hruipui thlun thar hmangin power supply a ṭhat phah dawn thu a sawi.

PE Minister chuan, East Lungdar 132 kV sub-station hman a nih chuan a châwm tur Zaizawhtlang 33kV sub-station leh Khawlailung 33kV sub-station-te'n kawlphetha ṭha zawk leh voltage ṭha zawk an hmuh dawn thu te, Melriat leh Lunglei inkar leh Barabi lama PE department hnathawhte chu hawn thuai tum a nih thu te, electric hrui thlungtu leh hun laklawha a chhiat thuta siam hna thawktu, thih hlauhawma awm reng ṭhinte chu duhsak leh zah an phu thute a sawi bawk.

Hawnna inkhawmah hian PE secretary H Lalengmawia, chief engineer Lalhmingliani Hmar, PE department hotute bakah, East Lungdar khawtlang hruaitute an tel a ni.