Mizoram aia hripui vei hmuh thar tamna state pali a awm
November 16, Thawhlehni khan Mizoramah Covid-19 vei mi 459 hmuh chhuah a ni a, India ramah Mizoram aia hripui vei hmuh thar tamna state pali a awm. Nimin khan hripui vei dam tawh mi 254 chhuahtir an ni a, Thawhlehni tlai dar 5 leh nimin tlai dar 5 inkarah hripui vanga thi an awm lo.
Covid-19 vei hmuh tharte chu mipa 212 leh hmeichhia 247 an ni a; ZMC laboratory-a hmuh chhuah 64, TrueNAT hmanga hmuh 51 leh RAT hmanga hmuh 344 a ni.
Thawhlehnia sample endik 5,174 aṭangin RT-PCR hmanga endik 474 chu 9.16% chiah a ni a; RAT hmanga endik zat 4,475 chu 86.49% a tling. TrueNAT hmanga endik 3.98% leh FIA hmanga endik 0.37% a ni bawk.
IDSP record angin, Mizoramah Covid-19 vei 1,29,845 hmuh chhuah a ni tawh a, mipa 62,905 leh hmeichhia 66,940 an ni a, mipa aiin hmeichhia 4,035-in an tam zawk. Nimin tlai dar 5 thleng khan mi 1,24,242 (95.68%) chhuahtir an ni tawh a, mi 467 (0.36%) thi tawhin, enkawl mek mi 5,136 (3.96%) an awm.
November 16, Thawhlehnia Covid-19 vei hmuh chhuah mi 459 zingah symptom nei mi 264 an awm a, mi 195 chu symptom nei lo an ni.
District hrang hranga swab sample endikah Covid-19 positivity rate 10% chung lam district pali a awm a, positivity rate san berna Serchhip district-ah positivity rate 25.86% a ni. Positivity rate 10% chung lam district dangte chu - Champhai 20.90%, Lunglei 11.94% leh Hnahthial 10.99% a ni.
Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 16, 2021 thlenga swab sample endik tawh 13,83,979 aṭanga RT-PCR hmanga endik zat percentage chu 23.13 a ni a, RAT hmanga endik zat chu 70.96% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir a ni.
Kum 2011 chhiarpui aṭanga chhûtin, Mizorama Covid-19 vei hmuh tawh 1,29,845 chu mi 1,000 zelah hripui vei mi 118 an awm ang a ni a; mi 1,00,000 zela Covid-19 vangin mi 42 an thi tawh ang a ni. Nimin khan tlai dar 5 thlengin hripui vei dam tawh mi 254 chhuahtir an ni a; Aizawl district-ah mi 163, Mamit district-ah 33, Siaha district-ah 19, Serchhip district-ah 15, Hnahthial district-ah 12, Champhai district-ah 11 leh Lawngtlai district-ah mi pakhat an chhuak.
