Ramri-ah political dialogue ṭha an ti Inner Line of 1875-ah an ding nghet
Mizoram State Boundary Committee chu an chairman Tawnluia, deputy chief minister hoin nimin khan Forensic Science Laboratory conference hall-ah a vawi thumna atan an ṭhukhawm. Mizoram ramri-ah Inner Line of 1875 chu an dinna a la nih reng thu an sawi a, Mizoram leh Assam ramri buai chingfel turin political level-a inbiak (political dialogue) neih ṭha an ti.
Deputy Chief Minister chuan meeting koh chhan leh an rêl tur tlangpui a sawifiah a, IGP (Headquarters) John Neihlaia'n ramria police awmte dinhmun leh dan leh thupek dinhmun a tarlang. Boundary Committee secretary Vanlalngaihsaka, Home secretary-in sawiho tur leh sorkar laipuiin hmarchhak state hrang hrang ramri buai zir chiang tura a ruat Manohar Parrikar Institute for Defense Studies and Analyses (MP-IDSA) team hnena thehluh tur Draft Approach Paper a sawi zau thung.
Sawiho a nih hnuah Boundary Committee chuan, Mizoram-Assam ramri chinfelna tura hmalak kawngah Inner Line of 1875-ah an la din reng thu an tarlang a; MP-IDSA team-in tun November thla tàwp lama Mizoram an tlawh huna thehluh tur Draft Approach Paper-a belh ngai leh paih ngaite bakah, ngaihdan hrang hrang an sawi a ni.
Home minister Lalchamliana chuan, "Rawtna hrang hrangah a ṭha ber tur ang zela kan hriata kan kal hi a pawimawh a, a ṭul anga inpawh fân theih a pawimawh," a ti a; Assam lamin an chan lamah hmasawnna hna thawh an ṭhulh bik loh avangin Mizoram lam pawhin hmasawnna hna thawh ṭhulh bik lo turin Kolasib leh Mamit DC-te hrilh an nih thu a sawi.
Chief secretary Dr Renu Sharma chuan, Mizoram tana ṭha ber turin theihtawp chhuaha ṭan lak a nih tur thu a sawi a, "Mizorama hna ka rawn zawm tirh aṭangin uluk takin ramri chungchang ka zir nghal a, Mizoram mipui leh mipui aiawh pawl hrang hrang te, political party-te leh Mizoram sorkarte ramri chungchanga an inlungrual ṭhap hi a lawmawm tak zet a ni," a ti.
Ṭhutkhawmah hian Tawnluia, Lalchamliana leh Renu Sharma-te bakah, minister of state Lalruatkima, chief information commissioner Lalnunmawia Chuaungo, Boundary Committee member dangte leh ramri chungchanga mithiam sawm bikte an tel a; Committee-in thutlukna an neihte chu Mizoram sorkarah thlen leh tur a ni.