KHAWTHLIR

Thisen pe
Salvation Army Youth, Kolasib Vengthar Corp chuan nimin khan Kolasib District Hospital blood bank-ah thisen pek an huaihawt a, thisen unit 11 pein, petute mipa pariat leh hmeichhia pathum an ni.

MLA-in lawmpui
Tun hnaia Padma Shri dawngtu C Kamlova, Mualpui chu bialtu MLA Lalchhuanthanga'n nimin khan lawmpuina thilpek a hlân. C Kamlova hian Padma Shri bakah national award dang chi li a lo dawng tawh a ni.

Trophy hlân
INTACH Headquarters, New Delhi-in zirlaite tana India ram pum huap project insiamsiak a buatsaiha lawmman dawngtu Vanrammawii, St Joseph Higher Secondary School zirlai hnenah INTACH, Mizoram Chapter convener P Rohmingthanga chuan November 16, Thawhlehni khan lawmpuina trophy leh certificate a hlân.

Union minister rawn zin dawn
Union minister of state Rao Inderjit Singh chu zan li riak turin Mizoramah a rawn zin dawn a, nimin khan Planning secretary Lalmalsawma Pachuau hoin lo dawnsawn dan tur ruahman a ni. Ruahmanna ang chuan, Rao Inderjit Singh hian Thenzawlah a hun tam zawk hmangin, Serchhip dist.-a sorkar hotute, tlawmngai pawl aiawh leh khawtlang hruaitute nen an inkawm ang.

Hmanrua inhlân
Aizawl DC Dr Lalhriatzuali Ralte chuan nimin khan Akshaya Patra, Mumbai aṭanga ration kit an dawnte chu Aizawl district-a de-addiction centre 24 leh children's home 20-a sem turin MSDRB field staff Vanlalhruaii hnenah a hlân.

SDG workshop
Planning & Programme Implementation department chuan nimin khan Siaha DRDA conference hall-ah 'Capacity building-cum-district level workshop on Sustainable Development Goals (SDGs)' an buatsaih a, line department hotu te, VC member-te leh tlawmngai pawl aiawhte an tel.