Raltlante tan chhawmdawlna sem

Hnahthial District Raltlan Committee (HDRC) chuan nimin khan Hnahthial district chhung khaw hrang hranga Myanmar ráltlânte tan chhawmdawlna chi hrang hrang an sem.

HDRC-in chhawmdawlna an semte chu buhfai ip 140, thawmhnaw ip 50 leh mutbu ip 30 a ni a; Thingsai, Bualpui, Ngharchhip, New Ngharchhip, Tuipui, Muallianpui leh Hnahthial khawpui chhungahte khuaa raltlan awmte tan an sem a ni.

Hnahthial DRC chuan, anmahni kaltlanga Myanmar raltlan chhawmdawlna petute zawng zawng chungah lawmthu an sawi a, ṭanpuina pe zel turin mipui an ngen nghal. Chhawmdawlna chu rualkhai taka pek a nih theih nan HDRC kaltlanga pe hrâm hrâm tura ngenin, sum faia ṭanpuina pe duh tan Mizoram Rural Bank account no. 97012884509-ah pek theih a nih thu an tarlang.

Hnahthial DC Office chhinchhiah danin, nimin khan Hnahthial district-ah Myanmar aṭanga raltlan luh belh an awm lo a; tun dinhmunah Hnahthial district-ah raltlan mi 2,107 awm mekin, an zingah chhungkaw 407 an tel.

Hnahthial district-a Myanmar raltlan awm mek zat chu - Thingsaiah mi 661, Cherhlunah mi 192, Bualpui H-ah mi 155, Ngharchhipah mi 170, New Ngharchhipah mi 462, Tarphoah mi 137, South Chawngtuiah mi 25, Khawhri-ah mi 62, Tuipui D-ah mi 35, Aithûrah mi 14, Leite-ah mi 11, South Vanlaiphaiah mi pariat leh Hnahthialah mi 231 a ni.