Kut hnathawktute chhawmdawl turin MPCC-in Mizoram sorkar an phût

Tun hnaia Airuah sur vanga Champhai leh Mizoram hmun dang danga harsatna tawk kut hnathawktute chu chhawmdawl turin Mizoram Pradesh Congress Committee (MPCC) chuan Mizoram sorkar an phût.

MPCC chuan thuchhuah siamin, Airuah sûr avangin Mizoram khawchhak lam bakah, Khawzawl district leh hmun dangahte tui lianin buh leh thlai tam tak a ti chhia tih an tarlang a; kut hnathawktu tam takin hah taka kumtluana an enkawlte seng thei lo leh seng tur nei loa an awm chu an tawrhpui thu an sawi.

Congress party chuan, ruahsur nasa leh tuilian vanga buh seng tur nei lo mi tam tak an awm bakah, thlasik thlai chìn mek - chana, knol khol, broccoli, changkha, zikhlum, hmarchapui, anṭam, chana leh dawnfawh chinna hmunte a chhe nasa hle a, sangha tam tak chán an awm bawk tih an tarlang a ni.

MPCC chuan, ruahsur nasa vanga harsatna tâwk kut hnathawktute dinhmun dik tak zir chiang tur leh chhiatna thlenga an chàn takte chhûtsak a, chhawmdawlna a rang thei ang bera pe turin Mizoram sorkar an ngen a, "Krismas hma ngeia kut hnathawktute manganna chhâwk zângkhai a nih theih nana hma la turin MNF sorkar kan beisei a ni," an ti.