Kohhran enkawl sikula thawk lai mi 15 Dah nghet turin Court-in sorkar a hriattir

Gauhati High Court (GHC), Aizawl Bench chuan tun hnai khan thutlukna siamin, kohhran enkawl sikul hrang hranga thawk mi 15 chu dah nghet turin Mizoram sorkar a hriattir.

Deficit higher secondary school panga - Synod HSS, Helen Lowry HSS, Baptist HSS, Modern English HSS-a lecturer mi 15 chuan GHC, Aizawl Bench-ah complaint an thehlut a, dah ngheh an phût a ni. High Court chuan lecturer-te ukil leh Mizoram sorkar ukilte thu thlen hrang hrangte a ngaihtuah hnuah tun hnai khan thutlukna a siam a, lecturer 15-te chu dah nghet turin Mizoram sorkar a hriattir a ni.

Court thutluknaa tarlan danin, mi 15-te hi School Managing Committee-in an lak a ni a, an appoinment order chu an district ṭheuhah District Education Officer-te'n pawmpuiin, Mizoram sorkarin contract-a a rawihte hlawh a pek ang pek an ni. An vai hian kum nga chhung an thawk tawh a, chuvangin, Mizoram sorkarin October 10, 2008-a notification a chhuah angin, dah ngheh theih tawh an ni.

Mizoram sorkar ukil Samuel Vanlalhriat Chhangte chuan, mi 15-te rawihnaah hian Mizoram sorkar leh Finance department pawmpuina hmuh tur a awm loh thu a sawi a, "Appoinment hi sorkar leh Finance department pawmpuinaa kalpui tur a ni," a ti.

Mi 15-te ukil Dinari T Azyu chuan, appoinment chu authority rintlak DEO-te'n an pawmpui a nih thu sawiin, "Chuvangin, an appoinment hi sorkarin a hriatpui loh a tih theih loh. Chu bakah, thla sarih chhung an hun pawtsei a, sorkarin an hlawh a pe leh hian an appoinment hi sorkarin a hriatpui tih a tilang," a ti a; Finance department pawmpuina tel loin an hlawh tur pek theih a nih loh thu a sawi.

Ukilte pahnih thusawi leh an lehkha thehluh hrang hrangte a zir chian hnuah GHC, Aizawl Bench chuan thutlukna a siam a, mi 15-te chu dah nghet a, thla li aia tlai loa tihfel turin thutlukn a siam a ni.