Lumpsum aided HSS 9-te khâr a ni

Mizoram Govt. Lumpsum Aided Higher Secondary School Association (MIGLAHSSA) chuan, adhoc aided-a hláng kai tura sorkar an ngennaah, sorkar thu an ngaihchan hun a tàwp avangin nimin aṭang khan tiam chin awm loin sikul an khar ṭan. Sikul khâr mek sikul pakuaah hian zirlai 850 vel an awm mek.

MIGLAHSSA hian June 11, 2018-a press release an siamah, an thil phûtah June 17 thleng Mizoram sorkar thu an ngaihchân tur thu leh, chumi chhunga thu lawmawm an hriat loh chuan June 18, 2018 aṭangin tiamchin awm loa sikul an khâr dawn thu an lo puang tawh a ni.

MIGLAHSSA-ah hian higher secondary school pakua - Phullen HSS, Thingsulthliah HSS, Tuisualral HSS, Zobawk HSS, Farkawn HSS, NE Khawdungsei HSS, East Lungdar HSS, West Phaileng HSS leh Zawlnuam HSS-te an tel a; an thil phût tihpuitlin phût nan hian June 7 khan Demand Day an lo hmang tawh a, zirlaite attendance chauh lain, lehkha an zirtir lo a ni.

Sikul khâr chungchangah MIGLAHSSA chuan nimin khan thuchhuah siamin, an member sikul pakuate chu khawtlangin kum 14 leh a aia tam mah an lo enkawl hram hram tawhte an nih thu a tarlang a, "Vawi tam tak thuneitute hnenah khawtlang phurrit hi chhâwk tura kan ngennain rah ṭha a chhuah theih loh avangin hreh tak chungin sikul kan khâr ta a ni," an ti.

Lungawi lohna lantira sikul khâr hi MIGLAHSSA member sikulte'n an zawm hlawm a, khaw ṭhenkhatah chuan khawtlang hruaitute huaihawtin mipui an pungkhawm. Zawlnuamah chuan V/C te, NGO te, political party-te leh Zawlnuam HSS Management Board huaihawtin an pungkhawm a; Zawlnuam HSS Management Board chairman leh Vengpui V/C president CT Sanga'n Zawlnuam HSS chu sorkar aṭanga thu lawmawm hriat a nih hma chu khâr a nih thu a puang.

CT Sanga chuan, an khuaa political party tin chu khawtlang hmangaiha pên chhuak tur leh, an thil tum a hlawhtlinna tur a nih chuan party-a an nihnate pawh bànsan ngam turin a ngen. An punkhawmnaah hian an thil phûtte Mizoram sorkarin a rang lama a tihhlawhtlin phûtna thu ziakte kengin, an au rual a ni.

Zobawk HSS-ah pawh sikul khâr pualin inkhawm tawi buatsaih a ni a, Action Coordination Committee chairman K Lalrodinga, Zobawk North V/C president chuan a kaihruai a; Zobawk HSS Managing Board chairman leh Action Coordination Committee treasurer H Lallawmzuali'n sikul chu tiam chin awm loin khâr a nih thu a puang. Inkhawm­ah hian Zobawk mipuite leh YMA, MHIP, MUP, MZP leh MSU hruaitute an tel a ni.