YMA nghak loa Tuirini lei siam turin BJP President-in state sorkar a phût

BJP, Mizoram Pradesh president Prof. JV Hluna chuan nimin khan an party pisaah thu sawiin, Sesawng leh Khawruhlian inkara Tuirini lei chim chu YMA siam hun nghak loa siam thuai turin Mizoram sorkar a phût thu a sawi.

Prof. JV Hluna chuan, Mizoram lei chim ṭhin leh kawng siamte a ṭha rei lo chu vanduaithlak a tih thu sawiin, "Mizoram sorkar­in a mawhphurhnaah a ngai thei miah lo hi mipui sorkar han tih chi an ni lo. Tunah pawh Tuirini lei chhia vanga YMA-te'n hnatlanga an siam pawh a chhe leh tawh a, YMA siamṭhat leh hun nghak loa sorkarin a siam thuai ka phût a ni," a ti.

June 17, Pathiannia Prime Minister-in India rama chief minister zawng zawng a koh khawmnaah Mizoram CM Lal Thanhawla a kal lo tih sawiin JV Hluna chuan, "A pawi hle a, kal se tun hnaia Mizoram hmun hrang hranga chhiatnate report pein, chhiat tâwkte chhawmdawlna tur Central sorkarah thlen se, Mizoram mipui harsatna tâwkte tan a ṭhat dawn tehlul nen," a ti a; CM Lal Thanhawla chu mipui harsatna aia NLUP hmanga vote hmuh dan tur ri­ngawt ngaihtuahah a puh.

Prime Minister-in chief minister-te meeting a neihpui chungchangah hian CM Lal Thanhawla chuan, meeting hun hi Pathianni a nih avangin a kal loh tur thu a lo sawi tawh a ni.