Mipui tuihâl tihreh hi kan tum ber - Vanlalhlana

Ṭangrual pawl, Zoram Peoples' Movement (ZPM) thupuangtu leh MPC senior vice president Vanlalhlana chuan, ZPM-a tel pawlte chu duh leh duh loh thuhmun nei an nih thu sawiin, "Mipui tuihâl tihreh hi kan tum ber a ni," a ti.

Nimina ZPM pisaa inkhawmah thu sawiin Vanlalhlana chuan, "Ṭangrual pawlte hi duh leh duh loh thuhmun nei kan ni a, Pu Zorama leh Pu Hawla kaihhruai­na ringawt ni loin, an hnathawh hi kan duh loh chu a ni," a ti a; anmahni an huat vang ni loin, an hnathawh vangin mipuiin ṭangrual lo thei loin an siam niin a sawi.

Mizoram hmun hrang hrangah ZPM-in hma an sawn zel tih sawiin Vanlalhlana chuan, "Ram pumah ZPM boruak a lian zel a. Kan kal emaw, sawi emaw kher loh hian hmun hrang hrangah ZPM Steering Committee a ding zel a ni," a ti.

Vanlalhlana chuan, thuneihna sem zâi chu ZPM thupui pakhat a ni tih sawiin, "Mipui hian administration, law & order leh hmasawnnaah beisei sang tak an neih avangin district headquarters nih an nawr a, kan area ngaihtuah chuan a nei tlem pawl kan la ni. ZPM a sorkar chuan kan hotute'n ngun takin an ngaihtuah ang," a ti a; thil tih theih reng tih a nih lohin harsatna a thleng ṭhin tih a sawi.

Aizawl khawpui tâwt zel chungchangah ZPM Spokesman chuan, "Kum 30 chuang a nih hnuah pawh hmalakna a nêp hle a, Aizawl khawpui kan chêp tawlh tawlh a; kan ram hian ZPM sorkar a mamawh tawh tak zet a ni,” a ti.