PWD Minister-in taima lehzual turin a chah

PWD hnuaia hna thawh mekte chu nimin khan PWD Engineer-in-Chief pisa conference hall-ah thlirho a ni a; PWD minister Lal Thanzara chuan, PWD hna thawktute chu mi tin mamawh kawng enkawltu an nih avangin, mipui rawngbawltu an nih hria taima lehzual turin a chah.

Lal Thanzara chuan, ruah nasa taka sûr karah tui lian, in chim leh kawng min vanga harsatna nasa tak Mizoramin a tawh mek laiin PWD thawktute'n mipui harsatna sutkian tumin theihtawp an chhuah tih a sawi a, "Kawng siam hna ṭhahnemngai taka thawh a nih vanglaia an hna tisukuk thei tura ruahtui tam tak a tla hi a pawi hle," a ti.

PWD Minister chuan, thingtlang khaw inkalpawhna kawng siamna scheme PMGSY bikah kum kal taa review meeting an neih leh tun inkara ruahmanna an siamte eng ang chiahin nge an bawhzui tih en zui a, ṭha­hnemngai lehzuala thawk turin PWD a thawktute a fuih.

Meeting kaihruaitu PWD secretary Lalram Thanga chuan, PWD chu Mizoram hmasawnna ruhrel siamtu pawimawh berte zinga mi an nih thu sawiin, "Division ṭhenkhat an thawh chak viau laiin ṭhenkhat hnufûm deuhte awm theih a ni. Hna thawh dan inhrilh a, infuih tawn leh hmasawn an ngaihna laite inenfiah a, inelna thianghlim siam nan leh inrâwnkhawmna aṭanga ngaituahna thar leh fing zawk a lo chhuah theih nan meeting neih ṭhin a ni," a ti.

Meeting-ah hian PWD hnuaia kawng siam, lei dawh, in sak leh enkawl zui hna thawh mek chungchang te, PWD hnuaia division hrang hrang 28 hnathawh mek leh hmalakna turte bakah fûrpui thleng mekin Mizoram hmun hrang hranga chhiatna a thlen mek leh la thleng thei hmachhawn dan turte sawiho a ni.