Agency kal tlanga awmpui rawih duh

Ferrando Domestic Wokers' Alliance (FDWA) hruaitute chuan nimin khan Aizawl Press Club-ah thuthar thehdarhtute an kâwm a; agency kaltlangin Mizoramah awmpui rawih ve tawh ni se an duh thu an sawi.

FDWA coordinator Mary Lalparliani chuan, June 16, 2011-ah International Labour Organisation (ILO) inkhawmpuiah awmpuite'n dikna leh chanvo an neih ve theihna turin khawvel pum huap tam thu­tlukna an siam thu a sawi a, "Khawvel ram tam zawkin ILO dan hi an hman tawh laiin, India erawh chuan member an nih angin an bei ve mek a, an hrual mûm thei hrih lo," a ti.

Mary Lalparliani chuan, khawi hmunah pawh awmpuite'n tihduhdah leh hnuaichhiah an tâwk fo ṭhin tih sawiin, "A chhan hrang hrang zingah khawtlanga dinhmun hniam lamte thawh a nih vang te, thiamna nei loa an thawh ṭhin vang te, mi in chhunga thawk an nih vang leh a tam ber 80% hi hmeichhia an nih vangte a ni," a ti a; Mizoramah pawh awmpuite'n tihduhdah leh hnuaichhiah an tuar niin a sawi.

Awmpuite himna laksaka tibawrhbángtu chu dan hmanga hrem theih an nih thu sawiin FDWA Coordinator chuan, "An dikna leh chanvo te, an zahawmnate anni chuan au chhuahpui nacháng an hre lo a ni thei, aw an nei ve tih pawh an hre lo a ni ngei ang. Chutih a hnêkin ngawi reng turin kan beisei tlat ṭhin a ni," a ti.

FDWA senior adviser Dr Vanlaltlani chuan, vantlang hriata humhim a, zah der ve awmpuite'n an phût thu sawiin, "A ruaitu leh awmpuite tan agency kaltlanga inrawih hi a him. Agency kaltlanga inrawih a nih chuan awmpui sual deuh, rûkrûk nena tlanbo daih turte a ven theih ang," a ti a; awmpui rawih dawnin hlawh fel taka siam a pawimawh thu a sawi.

FDWA legal adviser Raymond Lalbiakzama chuan, awmpuite leh anmahni chhawrtute hriat tur hrang hrang sawiin, "Sakhaw lamah intih­luih te, kut inthlak te, inkhung behte leh awmpui khuaikhemte dan kal a ni. Awmpuite an hnathawhna hmuna an chetsual palh emaw, an dam loh chuan a enkawlna senso chu a chhawrtute mawhphurhna a ni," a ti.

Universal Helpline-a senior call respondent Vanlalruatfeli Sailo chuan, Universal Women Helpline chu Mizoramah July 14, 2016-ah hawn a nih thu sawiin, "Hmeichhia harsatna tâwkte tan darkar 24 chhung kan duty a, 181 (toll free)-ah biak theih kan ni," a ti a; July 2016 aṭanga May 2018 chhungin call 2,406 dawngin, thubuai 403 an ziah luh thu a sawi.