Tun karah NH-54 laih tlang beisei
Mizoram sorkar chuan thuchhuah siamin, tun hnai ruahsûr nasa vanga Serchhip dái, Sailiam kâwn bula NH-54 kawngpui metre 100 vel min chu PWD (Highway) leh Serchhip DDMA ṭangkawpin tun kar chhunga laih tlang leh tumin hna an thawh mek thu a tarlang.
Sorkar thuchhuah tarlan danin, kawng bal siamṭhat dan ngaihtuaha sawiho tur hian PWD chief engineer (Highway) K Lalsawmvela chuan June 16, 2018 khan Serchhip tlawhin, Serchhip DMMA hotute nen an inkâwm a; kawng chu a min nasat avang leh kawng zauhna tura a chhak lam laih tur chu mimal ram a nih avangin bawhzui dan tur an rêl a ni.
NH-54 hi double lane-a sial tura hmalak (survey) mek a nih avangin, tuna kawng tihtlangna atana laih tura ram neitu chu NH-54 double lane project hnuaiah zangnadawmna pek theih dan a awm tura ngaih a ni a, ram neitu nen inbiak fel a nih chuan hna thawh nghal mai theiha a lan avangin Serchhip DC Sangchhin Chinzah chuan ram neitu a be nghal a ni. Ram neitu pawhin harsatna siam loin, NH-54 min siam hna thawh theih a ni ta a ni.
PWD Highway Division chuan June 17, Pathianni zing dar 8 aṭang khan kháwl pakhat hmangin kawng laih hna an thawk ṭan nghal a; nimin khan Keiṭum lam aṭangin khawl pakhat dangin a lai ṭan ve leh nghal bawk.
PWD CE K Lalsawmvela chuan Vanglaini palai zawhna chhangin, khuain a bumro loh a, tluang taka laih theih a nih chuan kawng tur laih hna bik chu ni li chhunga zawh theih an beisei thu a sawi a ni.