Hmasawnna hnathawh thlirho

Aizawl District Development Coordination & Monitoring Committee (DISHA) chu nimin khan Secretariat conference hall-ah an ṭhu a; Chairman CL Ruala, Lok Sabha MP leh co-chairman Ronald Sapa Tlau, Rajya Sabha MP ten an ho. Sorkar laipui scheme hnuaia hmasawnna hnathawh hrang hrang thlirho a ni.

Meeting-a tarlan danin, Aizawl district-ah hian MGNREGA hnuai­ah cheng nuai 809.67 hmuh a ni a, job card nei mi 26,885 an awm mek. MGNREGA Annual Award 2018 dawng tura Aizawl district chu rawt (nominated) a ni a, result erawh hriat a la ni lo.

Pradhan Mantri Awaas Yojana-Gramin (PMAY-G) hnuaiah kum 2018-19 chhungin 158 sak a ni a, Shyama Prasad Mukherjee Rurban Mission (SPMRM) scheme-ah cheng nuai 181.074 awmin, nuai 78.99 hman a ni tawh a, he scheme hi Aibawk leh Thingsulthliahah kalpui mek a ni.

Swachh Bharat Mission (Urban) atan cheng nuai 2091.10 hmuh aṭangin nuai 1,153 hman a ni tawh a, vantlang leh mimal hman tur inthiarna siam niin, UDPA department-in hna hi an kalpui. PMAY-Urban atan cheng nuai 1041.99 hmuh a ni a, cheng nuai 975.78 hman a ni tawh.

Sarva Shiksha Abhiyan (SSA) hnuaiah a thlawnin primary school-ah zirlaibu 12,805 leh middle school-ah zirlaibu 9,299 sem a ni a; zirlai 19,672 hnenah uniform a thlawna sem a ni. Mid Day Meal Scheme chu primary school 282 leh middle school 236-ah kalpui a ni bawk.

Meeting-ah hian Aizawl district chhunga MLA - R Lalzirliana, Lal­sawta, R Lalrinawma, Lt.Col. ZS Zuala, RL Pianmawia, Vanlal­zawma, K Sangṭhuama, Dr Ngur­dingliana leh R Lalrinawma te bakah, Aizawl Municipal Corporation mayor PC Lalhmingthanga te an tel a ni.