KHAWTHLIR

National workshop
RINPANS-a Department of Pharmacy leh Schrodinger Inc. te chuan nimin aṭang khan RIPANS-ah 'Molecular Docking, Virtual Screening and Computational Biology' tih thupui hmangin national workshop an buatsaih a, RIPANS director Dr Chawngthanliana'n a hawng. Workshop hi June 22 thleng neih tur a ni a, damdawi hmuh chhuahna kawnga tunlai thiamna thar ber hman ṭangkai dan zirho niin, India hmarchhak university hrang hranga mithiamte an tel a ni.

Kal khap
Lunglei SP C Lalthanmawia chuan thupek chhuahin, Aizawl-Lunglei World Bank Road-a Lunglei-Pukpui-Tlawng-Haulawng inkarah lirthei lian (HMV) ke 10 nei chin leh a chung lam kal a khap. Thupek hi nimin aṭanga hman ṭan a ni.

Mi 1,187 admit
May 2018 chhung khan Aizawl Civil Hospital-ah mi 34,823 an inentir a, mi 1,187 admit an ni. May thla chhung vek khan nau piang 336 an awm a; damlo inentir zinga 206 chu Mizoram páwna enkawl tura tih an ni.

Ruang chhar
June 15, 2018 chhun dar 12 vel aṭanga a awmna chin hriat loha bo Lalhminga (35) c/o Partinthangi, Zokhawthar ruang chu nimin chhun dar 12 vel khan Ṭiau Lui, Kelkang Ngawliah hmuh a ni. Lalhminga hi July 15-a an in aṭanga a chhuak chu a awmna chin hriat zui a nih loh avangin khawtlangin an zawng a ni.

Tlan theih
Traffic SP H Ramthlengliana chuan thupek chhuahin, Saron Veng - Tuithiang Veng leimin thenfai hna thawh a nih vanga he kawng lirthei tlan theih loh chu sût a nih thu leh, nimin June 18 chawhnu dar 2 aṭangin lirthei tlan phal a nih leh tawh thu a tarlang.

Bawlhhlawh hâl khap
Governor chuan thupek chhuahin, National Green Tribunal thuchhuak angin, Mizoram chhungah bawlhhlawh paihna hmun (landfill site) leh khawlaia bawlhhlawh hal khapna thupek a tichhuak. Khapna thupek hi December 12, 2018 aṭanga hman tan tur a ni a, thupek bawhchhiate chu Rs. 5000 aṭanga Rs. 25,000 chawi tir thlenga hrem theih an ni ang.