Assam-in ramriah hma a lâk avangin Home dept-in ramria hmalak a phal

Home department chuan November 8, 2021-a Mizoram leh Assam ramri depa awm district pahnih - Kolasib leh Mamit DC-te hnena ramria hmalakna titawp tura a hriattir hnuah, November 17, 2021 khan DC pahnih hi ramria hmasawnna hnathawh chhunzawm turin a hriattir.

Thuthar thehdarhtute zawhna chhangin Home dept. hotute chuan ramria hnathawh chhun-zawm tura hriattirna an chhuah leh chhan sawiin, "Kil hrang hrang aṭanga hmasawnna hnathawh leh phal tura ngenna kan dawn piah lamah, Assam sorkarin ramria an hmalak dan ngaihchan reng a ni a, hna an thawh chhunzawm reng avangin chawlhsan bik ṭha kan ti lo," an ti.

Home department chuan November 8 khan Kolasib leh Mamit DC-te hnenah hian Mizoram leh Assam ramri buai laiah chuan hmalakna neih loh tur (status quo) a nih thu a hriattir a; hei hi November 5, 2021-a Ministry of Home Affairs aṭanga thu an dawn anga tih a nih thu an tarlang.

Kolasib DC chuan, Home department aṭanga a thu hmuh bawhzuiin November 10-ah Vairengte SDO (Civil) leh Bairabi SDC hnenah lehkha a thawn a; ramri buaiah hmalakna nei lo tur leh construction work-te titawp turin a hriattir a ni.

November 11 khan Home minister Lalchamliana chuan Vanglaini palai zawhna chhangin, ramria hmasawnna tihtawp tura hriattirna hi a hriatpui loh thu a sawi a, "Order ka la hmu lo a, a ṭul angin hma kan la chhunzawm ang," a ti a ni.

Assam media-te tarlan danin, tun hnai khan Assam sorkara Environment & Forest Secretary chuan Mizoram Chief Secretary hnenah lehkha thawnin, Mizoramin Assam chhung km. 4 thlengin hma a la niin a tarlang a, hmalaknate chu tihtawptir turin a hrilh a ni.

Hetihlai hian Joint Action Committee (JAC) on Inner Line Forest Reserved Demand (ILFRD) chuan chief secretary Renu Sharma chu Mizoram leh Assam ramri bul vela hma la lo tura tihna thupek darkar 72 chhunga sût turin an phût a; November 15 tlai khan Chief Secretary hnenah hian lehkha an thehlut.