AR an insawnchhuah theihna atan MP-in inrawlh turin Larsap a ngen

Lok Sabha MP C Lalrosanga chuan nimin khan Governor Hari Babu Kambhampati chu Raj Bhavan-ah a kawm a; Assam Rifle-te Zokhawsanga an insawn chhuah theih nan leh sorkar laipuia Mizoram project tangte nawr kal kawnga inrawlh turin a ngen.

C Lalrosanga chuan Assam Rifle-te'n Zokhawsangah insawn chhuahna tur hmunhma an neih fel tawh thu Larsap hi a hrilh a, "Insawn chhuah kawngah Assam Rifle an khawmuang hi a ṭha lo. Mizo mipuiin an insawn chhuah hma an duh a, Aizawl khawpui chep lutuk chinfel nan pawh a thlakhlelhawm tawh tak zet," a ti.

Assam Rifle-te hian chhuanlam tur an nei tawh lo thu sawiin Lok Sabha MP chuan, "An DG pawhin furtui a hul hunah insawnchhuah an tum tih ka hnenah a lo sawi daih tawh a ni," a ti a, Larsap chu inrawlh turin a ngen.

C Lalrosanga chuan Mizoram project pawimawh tak tak sorkar laipuiah a la tangkhang mek tih sawiin," A bikin DoNER ministry-ah phei chuan Mizoram sorkarin project a thehluhte nawr kal ngai tak tak a awm nual. MP ka nihna angin vawi tam tak ka nawr tawh. Project ṭhenkhat hmanhmawhthlakte a awm avangin a nawr kal kawngah theihtawp chhuah a ngai," a ti.

Larsap chuan Mizoramin MP zuan zang tak a nei chu lawmawm a tih thu a sawi a, "MP pakhatin state hmasawnna atan thil tam tak a ti thei a, tun aia nasa zawkin ṭan la zual sauh ang che u," a ti a, MP Fund-te pawh a zavaia hmasawnna hnathawhna atana hmang turin a ngen.

Hari Babu Kambhampati chuan, 8th Schedules-a Mizo ṭawng telh chu thil awm tak nia a hria thu te, a theih anga hmalak a tum thu sawiin, Mizoram MP-te pawh an theih anga ṭan la turin a chah.