Dy. CM-in MFASA khawmpui a hmanpui

Mizoram Finance and Accounts Service Association (MFASA) chuan nimin khan Aijal Club-ah General Conference vawi 26-na an hmang a, deputy chief minister Tawnluia'n a hmanpui a, MFAS-te kutah sorkar sum enkawl hna a awm thu a sawi.

Dy. Chief Minister chuan MFAS-te hnathawh tlangpui chu budget siam leh enkawl te, sorkar account vawn ṭhat te, audit buaipui te, fund monitor-te leh vet-te a nih thu sawiin, an hnathawh leh mawhphurhna sanzia hriaa mipui leh sorkar tan eng thil thar nge ka ngaihtuah chhuah theih ang tih rilru pu turin a chah.

State dang leh ram changkang zawkten hmasawnna hna engnge an thawh tih zir a, Mizoram tan lakluh theih ve dan a awm em tihte zawnga hma la tura MFAS-te fuihin Tawnluia chuan, "In awmna hmun apiangah thurawn pe thei tur khawpa inchhiar taimain, ṭhahnemngaihna thar nen thawk ang che u," a ti.

Dy. Chief Minister chuan Mizoram sorkar sum enkawl hna chu MFAS-te kutah a awm thu sawiin, rinawmna nena thawk tur leh service hrang hrangte nen thawhhona ṭha a awm theih nan entawn tlaka awm turin a fuih.

MFAS khawmpui hi an president Ramchhuana'n kaihruaiin, kumin chhunga an member nunna chan pakhat sunin, chawhnu lamah rorel inkhawm an nei a, Mizoram sorkarin revenue tam zawk a lak luh theih nan institutional financing model mumal tak neih an rawt.

MFAS hi kum 1976 aṭangin Mizoram sorkarin a la (recruit) a, department leh office hrang hrangah post hrang hrang 87 an chelh a ni.