Governor-in MUP hruaitute a kawm

Governor Dr Hari Babu Kambhampati chuan nimin khan Mizoram Upa Pawl (MUP) hruaitute chu Raj Bhavan-ah a kawm. MUP hruaitute chuan Myanmar aṭanga Mizorama raltlante chhawmdawl leh ṭanpui kawngah hma lak sak tur leh sorkar laipuiin ngaihsak deuh se an duh thu an thlen.

MUP hruaitute chuan Indian Constitution 8th Schedule-a Mizo ṭawng telh tura theihtawp chhuah sak turin Larsap chu an ngen a, "Hei hian Mizo ṭhalaite central service leh All India Service-ah an luh theih nan bakah kawng hrang hrangah a ṭangkai dawn," an ti.

Mizoram chu India hmarchhak kilkhawra awm a nih avangin sorkar laipuiin a ngaihthah deuh nia an hriat thu leh Mizoramin ngaihsak a hlawh lehzual theih nana hma lak sak turin an ngen bawk.

Larsap chuan MUP hruaitute thu thlen chu a theih ang anga bawhzui sak a tum thu a sawi a; Mizoram mai bakah India hmarchhak chu Prime Minister pawhin a ngai pawimawh thu te, union minister-te chu hmarchhak state tlawh chhuak vek tura a hrilh thu leh tih hlawhtlin an tum thu te, Vice-President pawhin Mizoram rawn tlawh a tum thute a sawi.

MUP hi kum 1957-ah din a ni a, district pariatah branch 586 leh member 60,000 chuang an awm.