AVBD, Hnahthial Branch hawn a ni

Nimin khan Association for Voluntary Blood Donation (AVBD), Hnahthial Branch thar chu Hnahthial DC conference hall-ah DC R Lalremsanga'n a hawng a, hruaitu atana an ruat lailawkte a puang nghal.

Inkhawm hi AVBD president C Lalnunnema'n kaihruaiin, R Lalremsanga chuan, "Mizote hi mi tlawmngai tak, ṭhian chhan thih ngam kan ni. Tun hma chuan pasalṭhaten sa leh ral hmaah, khawtlang mipui nunau chak lo zawkte an venghim ṭhin a, mahse kha kha kan kalpel tawh. Tunah chuan kan thisen hlu tak hmangin dam lo mi mangang leh harsa zawkte ṭanpui tura kan inbuatsaih a ṭul tawh a, chu chu ṭhian chhan thih ngam nen a dang chuang miah lo," a ti.

Thusawitu dang Hnahthial District Hospital medical officer Dr Lalrengpuii Ralte chuan Hnahthial-ah AVBD a ding ta chu lawmawm a tih thu sawiin, "Hnahthial damdawi-in hi Blood Storage Centre anga pawm ni mah se, tun dinhmunah a la function hlei thei lo a, a function thuai theih nan AVBD Gen. Hqrs. lam pawh hma min lakpui turin ka ngen a che u," a ti a, damlo thisen mamawhtute tan Lunglei Civil Hospital aṭanga thisen an lak ṭhin thu a sawi.

Inkhawmah hian Aizawl Civil Hospital medical superintendent Dr Lalhmuchhuaka, Hnahthial Sub. Hqrs. YMA vice president R Rochhunga leh AVBD publicity secretary K Zothanparate pawhin thu an sawi.

AVBD, Hnahthial Branch tan hian bialtu MLA Dr R Lalthangliana, Health minister-in Rs 10,000 leh AVBD-in Rs 5,000 an hlan a ni.