Minister-in Mizoram Orchid Centre a hawng

Rural Development (RD) minister Lalruatkima chuan nimin khan Maubuangah Mizorama nauban awmte vawnṭhata an chanchin zirna hmun tur Mizoram Orchid Centre a hawng. Orchid Centre hi Shyama Prasad Mukherjee Rurban Mission (SPMRM) hnuaiah cheng nuai 390 senga sak a ni.

Lalruatkima chuan Mizoram Orchid Centre chu hun lokal zelah hmun hlu leh pawimawh tak a nih a beisei thu sawiin, "A par chu a man a to em avangin Mizoram economy tan thil ṭangkai, sum lakluh theihna leh mipuite tan eizawnna kawng hawng thei niin ka hria," a ti a, Mizorama nauban awmte humhalha suma chantir thei dan tur ngaituah a pawimawh dawn tih a sawi.

Aizawl South-III bialtu MLA Prof. F Lalnunmawia pawhin thu sawiin, SPMRM Scheme chu a bial Aibawk in an chhawr hle tih a sawi a, "Mipuiin kawng hrang hrangin an ṭangkaipui mek a, Orchid Centre hi Maubang khawtlang tan nakinah eizawnna kawng thar hawng thei ruahmanna a nih ka beisei. Khualzin hipna kawngah pawh ala ṭangkai thei dawn a ni," a ti.

Mizoram Orchid Centre-ah hian Mizorama nauban chi hrang hrang lakkhawma vawnṭhat te, tissue culture hmanga tihpun te, an chanchin zir leh eizawn nana hman ṭangkai theih dante zirna hmun tur a ni.

He huna tarlan danin, Mizoramah nauban chi 350 chuang chhinchhiah a ni tawh a, a ṭhen chu mang maithei (threatened & rare species) dinhmun a awm mek te an ni. Hengte hi Orchid Centre-ah hian seng luha tihpun tum a ni.

Mizoram Orchid Centre hi cheng nuai 390 sengin Mizoram Technocrats, Tuikhuahtlangte'n an siam a; April 2018-ah sak ṭan niin May 2019 khan sak zawh a ni.