Minister-in vety hospital building a hawng

Animal Husbandry & Veterinary (AH&Vety) minister Dr K Beichhua chuan nimin khan Lawngtlai AH&Vety farmer training hall-ah District Veterinary Hospital building thar a hawng. Building hi cheng nuai 90 senga sak a ni.

Dr K Beichhua chuan Covid-19 hri leng karah sorkarin ram hmasawnna hna thawh ṭhulh loin a theih ang angin hma a la reng tih a sawi a, "AH&Vety department hnuaiah district pasarihah vety hospital sak niin tuna mi nen pali chu hawn a ni tawh," a ti a, district thar pathumah pawh vety hospital sakna tur sum dah fel vek a nih tawh thu a sawi.

Artui thar chhuah lama Mizoram a intodelh theih nan sorkarin Tanhrila vety farm-ah ṭum khata artui sing ruk awp keu theihna (hatchery) a ruahman mek tih sawiin Dr K Beichhua chuan, "Lawngtlai district-a Mampui AH&Vety farm-a ṭum khata artui sang hnih awp keu theihna dah tawh pawh tihchangtlun tum mek a ni," a ti.

He hunah hian Lawngtlai East bialtu MLA H Biakzaua, AH&Vety secretary Lalzarmawii, AH&Vety director Dr H Laltlanmawia, Lawngtlai DC Dr Andrew H Vanlaldika, LADC CEM V Zirsanga leh sorkar hotute an tel.