LC by-election atan SEC nghak

Nimin khan Aizawl district election officer (DEO) Dr Lalhriatzuali Ralte chuan State Election Commission (SEC) thuchhuak angin Armed Veng, Laipuitlang, Tuithiang, Venghnuai leh Zemabawk local council by-election neihna atana Electoral Roll Summary Revision, 2021 neih zawh taka final roll a tlangzarh.

Electoral roll tlangzarh inkhawmah hian Aizawl District Municipal Election pisa chuan Aizawl khawpui huam chhunga local council paruka by-election buatsaih turin an inpeih thawkhat tawh thu leh SEC-in inthlan hun a puan an nghah mek thu an sawi.

Local council panga huamchhungah hian polling station 15 awmin, vote nei 15,039 an awm a, hmeichhia 7,989 leh mipa 7,050 an ni. Draft roll aiin final roll ah hian mi 23-in an tam zawk a, mipa aiin hmeichhe voter 939 in an tam.

LC by-election neihna tur dang pakhat, Republic Veng tan chuan final electoral roll chu March 31, 2021 khan tihchhuah a lo ni tawh. Polling station pathum awmin vote nei 3,118 an awm a; hmeichhia 1,700 leh mipa 1,418 niin, mi pakhatin final roll-ah hian an tam zawk.

Zawhna chhangin Aizawl DEO chuan local council by-election neih hun tur hi SEC chuan karlehah an puan theih an rin thu sawiin, "Krismas hmain heng election kaihhnawih hi zofel vek hman turin inbuatsaih mek a ni," a ti.