Covid-19 vangin mi 471 thi tawh

Nimin khan tlai dar 5 thlengin Covid-19 vanga thi pali an awm thu sorkar thuchhuahin a tarlang a, nimin tlai dar 5 thlenga Mizorama Covid-19 vanga thi chu 471 an tling tawh.

Nimin zing dar 7:05 khan Tlangngaihthanga (54), Chaltlang Lily Veng chu State Refferal Hospital-ah a thi a, October 19 khan hri a vei tih hriat chhuah niin October 20 khan admit a ni. Nimin chawhma dar 11 khan Khawngaihi (80), Dawrpui Veng, Aizawl chu pawh SRH-ZMC ah a thi a, natna dang nei tel a ni. November 16 khan hri a vei tih hriat chhuah niin hemi ni vek hian admit nghal a ni.

Khamliana (81), Armed Veng chu nimin chawhnu dar 2 khan ZMC-ah a thi. October 27 khan hri a vei tih hriat chhuah niin hemi ni vek hian admit nghal a ni a, natna dang nei tel a ni. K Zahleia (83), Ramthar Veng Aizawl pawh nimin chawhnu dar 2:45 khan ZMC-ah a thi a, natna dang nei tel a ni. November 17 khan hri a vei tih hriat chhuah niin hemi ni vek hian admit nghal a ni.