Sorkar sum rûl ṭha lote thil hlu laksakah Ṭan la thar turin Minister-in DC-te a fuih
Finance minister Lalsawta chuan, district commissioner (DC)-te chu sorkar sum rûl ṭha duh lo leh chhiah pe duh lote thil hlu laksak kawngah ṭan la thar turin a fuih.
Finance Minister hian nimina a pisaa Planning, Finance, Taxation, Revenue, Law & Judicial leh GAD hotute a kawmnaah, "Sorkar hi mipui ta a ni a, sorkar sum pawh mipui sum a ni. Sorkar hnena chhiah chhûng ṭha duh lo leh pawisa bá, sum tak tak pe duh lo mi ṭhenkhatte'n an sum batte an rulh ngei a ngai a, an leibáte hi The Mizoram Public Demands Recovery Act, 2001 hmanga
ṭhìn theih a ni," a ti. Sorkar chuan hna tam zawk thawhna atan sum a mamawh avangin leibáte chu hmuh kîr a nih theih nan chak taka hmalak a nih tur thu a sawi.
Lalsawta chuan, in sakna atan bak village council-te'n pass an pe thei lo tih leh thlai huan atan phei chuan pek theih a ni lo tih Court thutlukna a awm chungin, DC
ṭhenkhatte'n huan neitute tan zangnadawmna an dil luihpui ṭhin nia sawiin, chutiang chu a tawp theih nan ṭan lak a ṭul tih a sawi a, "Huan thlai chungchangah sorkarin compensation award-ah sum tam tak a sêng ṭhin hi tihtawp a ngai," a ti.
NEDP hnuaia kalpui mek, My Project, My NEDP - Mipui Mamawh Inṭawm Ruahmanna (MiMIR) chungchangah Finance Minister chuan, "MiMIR hi khua leh tuite'n neitu thinlung púa an chenna khua/veng mipui mamawh tlân leh inṭâwm theih, hmasawnna ruhrel dinna tur public infrastructure asset project, sorkar programme pangai aṭanga siam zen zen loh ang chi dinna tur a ni," a ti a; MiMIR atan district tin tan cheng nuai 100 ṭheuh ruahman a nih thu a sawi.
Planning secretary Dr C Vanlalramsanga sawi danin, MiMIR hnuaiah hian district tina khua zawng zawngte mipui mamawh inṭâwm project/concept note siama inelna buatsaih tur a ni a, concept paper thehluh ni hnuhnung ber chu July 16, 2018 a ni.
He mi atan hian MiMIR Joint Committee Local Council/Village Council Court, YMA, MUP, MHIP-te telna din ṭheuh tur a ni a, joint committee kaltlang hian concept note mahni DC ṭheuhah thehluh tur a ni. A ti ṭha ber
ṭheuh hnenah an project kalpuina atan cheng nuai 100 ṭheuh pek a ni ang.
Zangnadawmna chungchanga Court thutlukna leh sorkar hmalak theih dan sawi zautu Law & Judicial secretary Marli Vankung chuan, "The Mizoram Public Demands Recovery Act, 2001 hnuaiah bawrhsapte'n dan ang thlapa sorkar lei batute ṭhíng thei tur leh leiba rûl ṭha duh lote thil neih chhuhsak theihna thlenga thuneitu, Certificate Officer-te district tinah an ruat vek tur a ni," a ti.
Meeting-ah hian Finance secretary Lalnunmawia Chuaungo, Taxation secretary Vanlal Chhuanga, Aizawl DC Dr A Muthamma, Champhai DC Vanlalngaihsaka, Serchhip DC Sangchin Chinzah leh Land Revenue & Settlement director C Lalpeksanga te pawh an tel a ni.