NEET leh SMATEE 2018-ah Online-in counselling ti dawn

Higher & Technical Education (HTE) department chuan kum 2018-19 academic session aṭangin Mizoram state quota-a MBBS/BDS (NEET 2018 paltlangte tihṭhat dan indawt) leh professional course hrang hrang (SMATEE 2018 result-a tih ṭhat dan indawt)-te chu online counselling hmangin seat pek a ni dawn tih an tarlang.

HTE department tarlan danin, online counselling tihna tur hi www.mc.mizoram.gov.in ah a ni a, June 23, 2018-ah hawn ṭan tum a ni. Hetih lai hian, HTE Technical Wing, Chaltlang Lily Vengah Central Help Desk hawn an tum a, district tina DC pisaah help desk hawn an tum bawk. Hriat tur pawimawhte chu https://dhte.mizoram.gov.in ah en theih a ni.

Vanglaini palai zawhna chhangin HTE department hotute chuan, June 23, 2018 aṭanga online counselling ti ṭan turin an inbuatsaih mek tih an sawi a, online-a tih a nih avangin harsatna a awm lo tura an ngaih thu an sawi.

Hetih lai hian, Mizo Students' Union (MSU) hruaitute chuan nimin khan Higher & Technical Education department-a Technical Wing-ah technical officer Dr H Lalchhuanvela chu hmuin, technical entrance chungchangah an sawipui a; NEET 2018-a category hrang hranga tih ṭhat dan indawt (merit list) a hma lama târ chhuah a nih theih nana hma la turin an ngen.

MBBS leh BDS-ah hian Mizoramin quota (seat) a neih zat tur hriat chian a la ni lo a; chutih rualin, Mizoram Institute of Medi­cal Education and Research (MIMER)-ah class ṭan tur a nih tawh dawn avangin MBBS-ah chuan kum hmasa aiin Mizoramin seat a nei tam tawh tura ngaih a ni.

HTE department hotute'n Vanglaini an hrilh danin, kumina Mizoram quota-a MBBS seat zat hi North Eastern Council (NEC) hnuaiah chuan 13 vel a nih beisei a ni a; Central pool-a seat neih zat tur erawh hriat chian theih a la ni lo.

Mizoram quota-a zir turin NEET 2018 paltlangte chu dan angin category I, II leh III-ah ṭhen a ni leh dawn a; MIMER bikah chuan seat 100 zingah Mizoramin seat 70 a chang dawn a, seat 70-ah hian category-I tan seat 66, category-II tan seat pathum leh category tan seat pakhat ruahman a ni.

Kum 2017 (2017-18)-ah chuan Mizoramin MBBS-ah seat 29 a nei a, chu'ngte chu Central pool-ah seat 17 leh NEC-ah seat 12 a ni. BDS-ah chuan Central pool-ah seat pasarih leh NEC-ah seat pariat, a vaiin seat 15 a nei a ni. Kum 2016 (2016-17)-ah erawh chuan Mizoramin Central pool hnuaiah MBBS-ah seat 25 leh BDS-ah seat panga a nei thung.

Kum 2017-a MBBS leh BDS zir tur thlan lai vela HTE secretary Benjamina sawi danin, MBBS seat hi mipui nuai khat zelah seat pahnih leh a chanve tur a ni a, kum 2011 chhiarpui ang chuan Mizoramin MBBS seat 27 a nei tur a ni. Mahse, Mizoramin hmun dang (NEC) aṭanga seat 10 a hmuh avangin Central pool hnuaiah Mizoramin MBBS seat 17 a nei ta a ni.