KHAWTHLIR

Thisen pe
Thingsul Tlangnuam Branch YMA chuan nimin khan an khuaah blood donation camp an huaihawt a, Aizawl Civil Hospital tan thisen unit 37 an pe a, a petute mipa 36 leh hmeichhia pakhat an ni.

Lei tawlh enfiah
MLA RL Pianmawia chuan nimin khan a bial chhung, Darlawn Venghluna lei chetna hmun a tlawh a, Geology & Mineral Resources technical officer Zarzoliana'n a ṭawiawm. RL Pianmawia chuan, lei chêt vanga inthiar chhuak leh inṭhiah neitute chu a remchan anga chhawmdawl an nih tur thu sawiin, "Mithiamte thutlukna azirin a ṭul angin ruahmanna siam a ni ang a, hmalak zel a ni ang," a ti. Silpauline eng emaw zat a pe nghal a ni.

I-Day sawiho
Nimin khan Aizawl DC Dr A Muthamma hoin a pisaah sorkar department hrang hrang hotute'n kumina Independence Day lawmna atana inbuatsaih dan tur an sawiho a, parade-a tel tur naupangte hriselna endik lâwkna turin ruahmanna an siam.

Huan neitute zirtir
Horticulture department-a Tuidam Divisional Office chuan nimin khan Tuidamah thingfanghma chîn dan leh enkawl zirna an buatsaih. Training-ah hian huan neitu mi 100 an tel a, thil pawimawh hrang hrang a lem nen mithiamte'n an zirtir a ni. Training zawh hian loneitute chu Horticulture Complex-ah thingfanghma phun dan a taka zirtir an ni a, thingfanghma phun tur pek nghal an ni.

Bekang chi sem
Agriculture department chuan Thawhṭanni khan Farmers Welfare Programme hnuaia hmalakna chhunzawmna atan Kawrtethawveng leh Tuidam khuaah te loneitute tan bekang chi leh a chi chiahna bio-fertilizer an sem a, nimin khan Kawrthah leh Rengdil khuaa loneitute hnenah sem leh a ni.