Aspirational district - Mamit chungchang sawiho

Nimin khan Health Services conference hall-ah Principal Director kaihhruaiin National Institution for Transforming India (NITI) Aayog hnuaia Mizorama Aspirational district atana thlan Mamit district-a department hmalaknate sawiho a ni.

NITI Aayog hian India rama state 28-a district hnufual bik 115 a thlan zingah Mamit district a tel a, chungte chu Aspirational district tih niin, a bika hmalakna tura ruahman a ni. NITI Aayog-in a beisei dan chuan, Aspirational district-te chu an awmna state sorkarte'n an ngai pawimawh bik tur a ni a, District Vision Document & Action Plan 2022 siamte tihhlawhtlin a tum tur a ni.

District hnufual thlanah hian hmasawnna tehnaa tehfung hman tlángláwn - hriselna, ni tin eizawnna, kawlphetha, zirna, tui, inthiarna ṭha leh thil dangte hman a ni a; district 115-te hian hma an sawn chuan, United Nations Development Programme (UNDP)-in Human Development Index (HDI) a tihchhuah ṭhinah pawh India ramin hma a sawn theih beisei a ni. India hi HDI-ah ram 188 zingah 131-na a ni mek.

Mizoram Health & Family Welfare department pawhin action plan a siam tawh a, Mizoram sorkarah thehluh tawh a ni a; NITI Aayog-in hriselna leh nutrition lama Aspirational district tehna tur indicator 30 a thlanteah hmasawnna nei thei turin hmalak mek a nih thu an tarlang.

Health and Nutrition Indicator tlangpui chu - nu nau paiin enkawlna (antenatal care), nu hriselna (anaemia), nau neihna hmun (institutional delivery), nau chhartu (skilled-birth attendance), nau hnute pek, naupang hriselna (nutrition kaihhnawih), hritlang leh kawṭhalo enkawlna, hri danna, TB enkawlna, sub-centre tihchangtlunna (health & wellness centres), anganwadi tihchangtlunna leh Indian Public Health Standards (IPHS)-in a duan anga primary health centre (PHC) leh district hospital-ah mamawh ang thawktu dahte a ni.

Health department tarlan danin, tun dinhmunah Mamit district hi Mizorama district dangte aiin kawng tam takin a hnufual a; Health department-in hna a thawhnaah thawktu (man power) neih changtlun dah pawimawh a ni. Mamit District Hospital-ah specialist doctor paruk awm mekin, chu'ng zinga pathum chu tun hnaia dah thar an ni a; chutih laiin, doctor awm lohna damdawi-in (PHC) paklhat a awm.

Kumin June 1 aṭanga August 15 chhungin Mamit district-ah hian Ministry of Panchayati Raj hnuaiah Extended Gram Swaraj Abhiyan (EGSA) hman a ni dawn a; Health department bik chuan PHC-te tihchangtlun nan leh TB enkawl kawnga beihpui thlak nan hri danna (immunization) hman an tum a ni.