Chhawmdawlna atan cheng vbc. 35.9 hmu

Disaster Management & Rehabilitation (DMR) minister C Ngunlianchunga hoin June 18, Thawhṭanni khan Lawngtlai DC conference hall-ah khuarel chhiatna thlen chánga hmalak dan tur sawiho a ni. Minister chuan, khuarel chhiatna a thlena chhawmdawl hna thawhnaa hman turin kumin atan Mizoramin cheng vbc. 35.9 a hmuh thu a sawi.

C Ngunlianchunga chuan, chhiatna thlenga harsatna tawkte'n DC office lama report an pekte bawhzui vat a nih loh chuan mipuite'n harsatna an tawh phah fo thei tih sawiin, chutiang thil a awm loh nan theihtawp chhuah turin thawktute a chah a, "Khuarel chhiatna vanga in leh lo leh thil dang chhia report bothlau mai mai a awm loh nan bawhzui vat ṭhin a ṭul a ni," a ti.

DMR Minister chuan, state sorkar­in chhiatna tâwkte chhawm­dawl nan sum eng emaw zat a dah ṭhin tih sawiin, "Tuar na nâ nâ ṭanpui chu sorkar pawhin a hreh ngai lo," a ti. Khuarel chhiatna a thlena remchanga laa dik lo taka chhawmdawlna dawng an awm loh nan department lamin dik taka report an pek a, a hmunah kal chilha endik zel ni se a duh thu a sawi bawk.

Sawihonaah hian sorkar department hrang hrang aiawh te, veng hrang hrang V/C president-te leh Central YLA aiawhte an tel a ni.