Mizorama industry tênaute a bika ṭanpui turin MSME Minister ngen

November 18, Ningani khan Ministry of Micro, Small & Medium Enterprises (MSME) bultumin Hotel Taj Vivanta, Guwahati-ah North East MSME Conclave hman a ni. Commerce and Industries minister Dr R Lalthangliana chuan, Mizoram chu Covid-19 hripuiin a nuai nat ber zinga mi a nih avangin industry tênau (micro enterprise)-te khaichhuah nan a bika ṭanpuina a mamawh thu a sawi.

Dr R Lalthangliana chuan, Mizorama industry-te dinhmun leh Covid-19 vanga industrial unit-te'n harsatna an tawhte sawiin, "Mizoram chu hripuiin a nuai nat ber zinga mi a nih avangin industry tênaute’n an tuar nasa em em a, anmahni chhanchhuahna tur sorkar laipui aṭanga ṭanpuina pek a nih loh chuan industrial unit tam tak chu hna thawk chhunzawm thei loa khar mai hmabak an ni," a ti.

Mizorama micro enterprise-te chhan­chhuahna tur concept note an siam thu sawiin R Lalthangliana chuan, "MSME ministry-ah thehluh a ni tawh," a ti a; Mizorama industrial unit-te khai chhuah an nih theih nan a bik taka ṭanpuina pe turin Union MSME minister Narayan Rane a ngen.

Dr R Lalthangliana chuan, DoNER leh MSME ministry-ah sum a tam thu sawiin, "Heti a nih rual hian Mizoram leh hmarchhak state-te natna damdawi tak hi min la chawh thiam lo a, kalphung khirhkhàn lutuka an siam hi hmarchhak state-te tan bika thlahdul deuh a ngai a ni. Central guidelines ang diak diaka kal hi hmarchhak state-ah hian a remchang lo a, chhan hrang hrang a awm avangin kan state-te ang tan chuan a bik deuha her rem a ngai a ni," a ti.

MSME minister Narayan Rane chuan, sorkar laipuiin hmarchhak state-te a ngai pawimawh nia sawiin, "Hmarchhak state tihmasawn tur chuan hmarchhaka MSME-te’n hma an sawn a ngai a ni," a ti a; India ram puma MSME awm zingah 1% chauh hmarchhakah a la awm thu leh India Act East Policy chak zawka kalpui turin hmarchhak state-te tihhmasawn a pawimawh thu a sawi.

Commerce and Industries minister R Lalthangliana hian MSME Minister hi a hran­paa hmu lehin, MSME-a proposal an thehluh chungchang a sawipui bawk a; Commerce & Industries secretary Esther Lalruatkimi, additional director Lalhmunsiama leh depart­ment hotu dangte'n an ṭawiawm.

Conclave-ah hian MSME ministry hnuaia scheme awmte tarlan a ni a, scheme hrang hranga hmarchhak state-in harsatna a neihte sawi a ni.