KHAWTHLIR

Thisen pe
KṬP, Damveng Branch chuan an branch din champha pualin nimin khan an kohhran hall-ah thisen pek an huaihawt a, Synod Hospital tan thisen unit 37 pein, petute mipa 23 leh hmeichhia 14 an ni.

DD hlân dawn
Aizawl Theological College (ATC) Principal, faculty & staff chuan December 4, 2021-a Serampore College Convocation-ah Rev. Chuauṭhuama hnenah doctor of divinity (honoris causa) hlan a ni dawn tih an tarlang a, "Mizo Kristiante zingah Rev. Chuauṭhuama te ang mi kan nei hi kan chhuangin DD degree a dawng tur hi kan lawmpui tak zet a ni," an ti.

Senghawi turin ti
Mizoram Cleanliness Competition, 2021 pualin Mamit Sub-Divisional Road Protection Squad chuan November 18, Ningani khan SDO (Sadar) Vanlalhmachhuana hoin site inspection an nei a, kawngpui nêk chêpa in sakna bungrua leh bungraw dang dahte an enfiah. Dan bawhchhiate chu hma la zui lo turin an hriattir a, tun kar chhung ngeia senghawi turin an hrilh a ni.

Ngûr bazar hawng
Health & Family Welfare Board vice chairman Dr ZR Thiamsanga, MLA chuan nimin khan a bial chhunga MLA fund Rs 13,00,000 hmanga sak Ngúr Bazar Shed leh Model Village Office a hawng. Ngûr khaw ram hausakna la chhuak thei tura bul ṭana hmachhawp tam tak neih tum a nih thu a sawi.

Vaccine 12,56,017 pek a ni tawh
November 18, Ningani thleng khan Mizoramah Covid-19 vaccine dose 12,56,017 pek a ni tawh. Vaccine hi mi 7,09,935 hnenah dose khatna pek a ni tawh a, chu'ng zinga mi 5,46,082 chuan dose hnihna an la tawh a, dose pek tawh zawng zawng chu 12,56,017 niin, chu'ng zinga dose 4,207 chu private facility-a pek a ni. Ningani bikah khan first dose 781 leh second dose 2,375 pek a ni a, a vaiin dose 3,156 a ni.