UNAIDS leh World Bank hotute hnenah Dr Thangtea'n Mizoram pui turin a ngen

USA-a chám mek Health minister Dr R Lalthangliana chuan tun hnai khan Washington DC-ah UNAIDS hotute leh World Bank hotute a kâwm a, kawng hrang hrangah Mizoram pui turin a ngen. Dr R Lalthangliana nena an inkawmnaah UNAIDS hotute chu international director Regan Hofmann-i'n a ho a ni.

Minister Dr R Lalthangliana chuan, HIV/AIDS lama Mizo­ram dinhmun tlangpui sawiin, Mizoram harsatnate hriatthiampuia uluk leh rintlak lehzuala UNAIDS-te'n kawng hrang hranga an thiamna leh hmanrua neih ang ang leh a ṭul dan azira sum leh technical support lam thleng pawha hmalakpui turin a ngen.

UNAIDS hotute chuan, Health Minister thil thlente chu an ngaih pawimawh thu leh a theih ang angin Mizoram tan theihtawp chhuah an tum thu an sawi a; hun rei lote hnuah Mizoram sorkara official-te nen hmalak zel dan tur sawiho an rawt.

UNAIDS Director chuan, an inkawmhona chuan rah ṭha tak a chhuah ngei a beisei thu sawiin, USA sorkar pawh sawipui nghal a tum thu Health Minister a hrilh.

World Bank chief manager Trina Haque leh official dangte nen an inkawmnaah Dr R Lalthangliana chuan, Health department hmalak zelna tura Mizoram sorkar leh central sorkar kaltlanga Preliminary Project Proposals tihhlawhtlin a nih theih nana hma la turin a thlen.

Health Minister hian John Hopkins Programme for International Education in Gynea­cology and Obsteterics (JHPIEGO) CEO Leslie Mancuso leh official dangte pawh a kâwm. Mizoram hi JHPIEGO-te nen central sorkar kaltlanga Com­prehensive Primary Care, Ayush­man Bharat hmanga Health & Wellness Centres din zelna tur USAID fund aṭanga hmalakna a ni.

Project hi Mizorama health sub-centre-te nasa lehzuala tihchangtlun a, B.Sc. (Nursing) graduate awpna hnuaia kalpuina tur a ni. Ruahman dan chuan, Mizo­rama sub-centre zawng zawng te, Health & Wellness Centres-a hlan kai a, thiamna sang zawk nei thawktu leh dam­dawi leh hmanraw ṭha zawk nena thuam bakah, PHC neih mekte tihchangtlun a ni ang.

Meeting-ah hian Dr R Lalthangliana chuan, hmalakna turah Mizoram chuan a tiṭha ber ni thei tura hmalak an tum thu a sawi a, "Chutiang a nih theihna atan chuan USA lam aṭanga kan thawhpui JHPIEGO official-te pawhin theihtawp min chhuahpui a ngai a ni," a ti.

Dr R Lalthangliana hian Mizo Society of America (MSA)-te pawh a kâwm a, zanriah a buatsaihsak a ni.