Zawlpala Thlantlang parking hawng

Phulpui khuaa Zawlpala Thlantlang tlawhtute tana lirthei dahna hmun leh YMA In sak tharte chu November 18, Ningani khan Rural Development (RD) minister Lalruatkima'n a hawng.

Minister chuan, muster roll-te sorkarin a hriat reng thu leh anmahni ngaihtuah chu sorkar mawh a nih thu sawi.

Lalruatkima chuan, DRDA-ah sorkar laipuiin sum pek (funding) a titawp dawn nia tun hnaia thuthang awm chungchang sawiin, "Hei hi an sawina a rei tawh a, mahse, a thawktute tan thlaphànna tur a awm lo. Mi 87 lai Mizoram sorkarin a absorb (la lut) tawh a, a bâng mi 25 chungchang pawh sorkarin a ngaihtuah reng a ni," a ti.

Minister chuan, DRDA-a thawkte bakah, muster roll-te pawh sorkarin a hriat reng thu a sawi a, "An chungchang ngaituah hi sorkar mawh a ni a, an tan kawng a khàr hnan lo ang tih ka ring tlat a ni," a ti bawk.

Zawlpala Thlantlang chanchin chu thawnthu ngaihnawm tak, Pathian thil siam ropuizia tilangtu nia a hriat thu sawiin Lalruatkima chuan, "Phulpui leh a chhehvel hi khualzin hîp theihna theihna nei ṭha tak mai a ni a, hengte hi a khaw mipuiin a hlâwkna an tèl dan kawng hrang hrang ngaihtuah a pawimawh," a ti a; eco-tourism, adventure tourism leh rural tourism-a hmalak theih dante a sawi.

Bialtu MLA Prof. F Lalnun-mawia pawhin thu sawiin, Phulpui chu khaw entawn tlak, taima leh tlawmngai nia a hriat thu a sawi a, "Zawlpala Thlantlang leh Tuirivâng lui tlawhtute an tam zel avangin he lai hmunhma buatsaih hi a pawimawh a, Tourism department-te pawhin he lai hmun cheibâwlna turin hma la ve se," a ti.

Lirthei dahna leh YMA In hi Shyama Prasad Mukherjee Rurban Mission (SPMRM) leh MGNREGS Convergence fund aṭanga hmuh cheng nuai 20 hmanga sak a ni a; hawnna inkhawm hi RD director R Lalṭhazuala'n a kaihruai a, Aibawk BDO Chinlianmanga'n in sak dan a sawi a ni.