Inchi khat pawh kan la hnung tawlh lo - MNF Vice President
MNF vice president Lalthlengliana chuan, MNF chu an independence policy-ah inchi khat pawh an la hnung tawlh lo niin a sawi.
Lalthlengliana hian nimin khan Hualngohmun khuaa party dang VC member-te MNF party-ah a lawm lut niin MNF chuan an tarlang. Lalthlengliana chuan, "Independent policy-ah khan inchi khat pawh kan la hnung tawlh lo a, inremna thuthlung kha kan zah mai zawk a ni, politics-ah full-stop a awm lo," a ti.
Lalthlengliana chuan, MNF chu martarte thisenin a bual a ni tih sawiin, "Rambuai lai khan India sorkarin jet fighter leh armoured car nen nasa takin Mizote min bei a, nasa taka min bei chung pawhin kan hotute kha an tláwm reng reng lo. Kan hnam movement kha beihna nasa tak avangin a chat lek lek a, mahse, Pathianin min hruai chhuak zel a ni," a ti a; Indian Constitution tidanglam khawpin India nen inremna an neih thu a sawi.
MNF Vice President chuan ZPM chungchang sawiin, "Kalphung thar leh ram hmangaih nia insawi vawiina ZPM party-a iak iakte hian ram leh hnam tan London an thleng ve lo a, China leh Burma an thleng ve hek lo. Ram hmangaih ber anga an râk an râk ve hi an zahpuiawm khawp mai," a ti a; Congress party pawh an tlâkchhiat avangin kum 2023 inthlanpuiah MNF an sorkar leh ngei dawn niin a sawi bawk.
Inkhawmah hian MLA Prof. F Lalnunmawia pawhin thu sawiin, kum 2023 inthlanpuiah MNF a sorkar leh ngei dawn niin a sawi a, "Kum 2023 MLA General Election-ah MNF hi a sorkar leh ngei dawn tih ring ngam ang u. MNF chu kan ngaihdan a ni loh deuh cháng pawhin kan fan thei a, kan thinlung a nel a ni," a ti.