YMA inthlan turah Serchhip YMA-in Tawktarh nei dawngsawng lo turin chah

YMA Sub-Head­quarters, Serchhip hruai­tute nimina an conference hall-a ṭhukhawm chuan, Central YMA hruaitu thlan turah vote zawnga tawktarh siama rawn betu an awm a nih chuan lo dawngsawng lo turin an huam chhunga branch leh group-te an chah.

Serchhip YMA hi December 16, 2021-a YMA General Conference vawi 73-na neih tur chung­chang ngaihtuahin an ṭhukhawm a, "CYMA hruaitu thlanna neih turah hian vote zawnna atana conference kalna senso intumsak emaw, thlenna ngaihtuahsak emaw, thil dang hmanga group leh branch YMA hruaitute rawn bia an awm a nih chuan heng mite hi lo dawngsawn loh tur. Hemi chungchangah hian branch leh group YMA-te hnenah pawh thuchhuah siam ni se," an ti.

Kumina YMA General Conference neih turah hian rorel palai kal thei tihtlem a nih avangin an huam chhunga YMA branch leh group-te chu palai kal thei tur zat bithliah hnawhkhah ngei tum turin an ngen bawk.

Serchhip YMA chuan, Krismas leh kumthar vuakvêt thleng tur chu boruak muanawm tak hnuaia hman a nih theihna turin sorkarin hâlpuah leh hâlmawi hrang hrang khapna a siamte ṭha taka zawm a nih theih nan an huam chhunga hmalak dan tur an rêl a; branch tinte'n an huam chhungah duty insiam lehin, Sub-Hqrs. YMA hruaituten a remchan angin tlawh kual leh ni se, an ti.

An huam chhunga home, jail leh damdawi-in hrang hrangah Krismas thilpek hlan te, covid care centre leh community covid care centre-a awmte a remchan anga thilpek hlante an rel bawk.